काठमाडौँ । भाद्र शुक्ल पूर्णिमाका दिन आज(आइतबार) खग्रास चन्द्रग्रहण लाग्दैछ । नेपालमा राति १० बजेर ११ मिनेटमा शुरु भई १ बजेर ४१ मिनेटमा पूरा हुने नेपाल पञ्चाङ्ग निर्णायक समितिका अध्यक्ष प्रा. श्रीकृष्ण अधिकारीले जानकारी दिए ।
पञ्चाङ्गहरूका अनुसार १० ः ११ मा ग्रहण स्पर्श, ११ ः १५ बजे सम्मीलन, ११ ः ५६ बजे मध्य, १२ ः ३८ बजे उन्मिलन र १ ः ४१ बजे मोक्ष हुनेछ । नेपाल, भारतसहित एसियाका धेरै देशबाट यो ग्रहणलाई सुरुदेखि अन्तसम्म अवलोकन गर्न सकिने खगोलशास्त्री प्रा.डा. जयन्त आचार्यले जानकारी दिए ।
फलित ज्योतिशास्त्रअनुसार मिथुन, कर्कट, सिंह, तुला, वृश्चिक, मकर, कुम्भ र मीन राशि भएकालाई ग्रहण नहेर्न निर्देश गरिएको छ । अन्य राशिकाले भने हेर्न सक्ने बताइएको छ । मेष राशि भएकालाई लाभ, वृषलाई सुख, मिथुनलाई माननाश र कर्कटलाई कष्ट फल रहेको बताइएको छ । यस्तै सिंहलाई स्त्री पीडा, कन्यालाई सुख, तुलालाई चिन्ता र वृश्चिकलाई व्यथा फलादेश गरिएको छ । धनुलाई श्रीप्राप्ति, मकरलाई क्षति, कुम्भलाई घात र मीन राशि भएकालाई व्यय फल प्राप्त हुने बताइएको छ ।
शतभिषा र पूर्वाभाद्रपदा नक्षत्र र कुम्भ राशि भएकालाई यो ग्रहणले अति कष्ट दिने पञ्चाङ्गमा उल्लेख छ ।
पौराणिक मान्यताअनुसार ग्रहणको केही समयअघिदेखि सुतक लाग्छ । दिउँसो १ः११ बजेदेखि बालबालिका, वृद्ध र रोगी बाहेक अरूलाई भोजन निषेध गरिएको छ । चन्द्रग्रहण अवधिमा मन्त्रजप र हवनजस्ता कार्य गर्न निर्देश गरिएको छ । शयन, खानपिन तथा मैथुन जस्ता कार्यलाई निषेध गरिएको छ ।
यो वर्ष फागुन १९ गते मंगलबार फाल्गुन शुक्ल पूर्णिमाका दिन ग्रस्तोदित खण्डग्रास चन्द्रग्रहण पनि लाग्ने पञ्चाङ्गमा उल्लेख छ । थाहा खबरबाट
