प्रदेश प्रमुख अमिक शेरचनले संविधानको धारा १६८ को उपधारा २ बमोजिम आचार्यलाई मुख्यमन्त्रीमा नियुक्त गर्नुभएको हो ।
यसअघि आचार्यले ५६ सांसदको हस्ताक्षरसहित प्रदेश प्रमुख समक्षा मुख्यमन्त्रीमा दाबी पेश गर्नुभएको थियो । आचार्यले नेकपा एमालेका २९ जना र कांग्रेसका २७ जना सांसदको समर्थनसहित दाबी पेश गर्नुभएको थियो ।
८७ सदस्यीय प्रदेशसभामा सरकार गठनको लागि ४४ सांसदको समर्थन चाहिन्छ ।
लुम्बिनी प्रदेशमा एमाले संसदीय दलको नेता लीला गिरी भए पनि अन्तिममा आएर आचार्यलाई एमाले केन्द्रबाट मुख्यमन्त्री बनाउन निर्देशन भएको थियो । अर्घाखाँची १ (क) बाट निर्वाचित सांसद आचार्य यसअघि आर्थिक मामिला तथा योजनामन्त्री हुनुभएको थियो ।
नेकपा माओवादी सांसदिय दलका नेता महराले आइतबार पदबाट राजीनामा दिएपछि प्रदेश प्रमुख शेरचनले संविधानको धारा १६८ को २ अनुसार नयाँ सरकार गठनका लागि आह्वान गर्नुभएको थियो ।
महराले लुम्बिनी प्रदेश सभाको चौथो अधिवेशनको २४ औं बैठकलाई आइतवार सम्बोधन गर्दै राजीनामा दिनुभएको थियो ।
