सुनको मूल्यमा नयाँ रेकर्ड, एक तोलाको पुग्यो ७० हजार

संसार पोष्ट
काठमाडौ, २३ साउन । सुनको मूल्य बिहिबार ५ सय रुपैयाँ बढेर प्रतितोला ७० हजार रुपैयाँ पुगेका छ ।
यो मूल्य हालसम्मकै उच्च हो । छापावल सुनको मूल्य बुधबारको मुल्यमा ६ सय रुपैयाँले बढेर ७० हजार रुपैयाँ पुगेको हो । यसैगरी तेजाबी सुन पनि प्रतितोला ६९ हजार ७ सय रुपैयाँमा बिहिबार कारोबार भएको छ । चाँदी भने प्रतितोला ८ सय २५ रुपैयाँमा कारोबार भएको छ ।
सुनचाँदी व्यवसायी महासंघका अनुसार सुनको मूल्य पछिल्लो दुई दिनमै २ हजार रुपैयाँले बढेर नयाँ रेकर्ड कायम गरेको छ । मंगलबार सुनको कारोबार प्रतितोला ६८ हजार रुपैयाँमा भएको थियो । पछिल्लो समय सुनको भाउले हरेक दिन नयाँ रेकर्ड कायम गर्दै आएको छ । पछिल्लो एक सातामै प्रतितोला ४ हजार पाँच सय रुपैयाँले सुनको मूल्य वृद्धि भएको छ ।
सुनले यसअघि बनाएको नयाँ रेडर्कलाई तोड्दै अघि बढेको छ । यसअघि सुन प्रतितोला ६९ हजार ५ सयमा पुगेर सर्वाधिक महँगोको नयाँ रेकर्ड बनाएको थियो । विश्वबजारमा सुनको मूल्यलाई अमेरिका र इरानबीच उत्पन्न भएको तनावले पनि असर गरिरहेको छ । शक्तिशाली राष्ट्रबीच व्यापारिक तनाव उत्पन्न हुँदा स्थानीय बजारमा सुनको भाउ उच्चविन्दुमा पुग्ने गरेको छ । अमेरिका, इरान, भारत र उत्तर कोरियाबीचको सम्बन्धले विश्व आर्थिक बजारमा सुन, तेलको मूल्यलाई थपघट गराउँदै आएको छ ।