प्रचण्डको अभिव्यक्तिप्रति राजावादी संघसंस्थाको आपत्ति

संसार पोष्ट
बुटवल, २२ साउन । नेकपाका अध्यक्ष पुष्पकमल दाहाल प्रचण्डले पुर्वराजा ज्ञानेन्द्र शााहलाई नागार्जुन दरबारबाट निकाल्ने चेतावनी दिएको घटनाप्रति गोरक्ष राष्ट्रिय जागरण अभियान नेपाल, नागरिक संघर्ष समाज रुपन्देही लगायतका राजावादी संघ संस्थाहरुले आपत्ति जनाएका छन् ।
गोरक्ष राष्ट्रिय जागरण अभियान नेपाल र नागरिक संघर्ष समाज रुपन्देहीले बुधबार बुटवलमा पत्रकार सम्मेलनको आयोजना गरी प्रचण्डको अभिव्यक्तिप्रति आपत्ति जनाएका हुन् ।
पत्रकार सम्मेलनमा बोल्दै गोरक्ष राष्ट्रिय जागरण अभियान नेपालका राजनीतिक संयोजक रुपसिंह थापाले प्रचण्डको अभिव्यक्ति आतंकित मानसिकताको उपज भएको संज्ञा दिदै सो अभिव्यक्ति घोर आपत्तिजनक र खेदयोग्य भएको बताउनुभयो ।
राजनीतिक दलहरुको निर्णय स्विकार गरेर नागार्जुन दरबारमा बसेका पुर्व राजा ज्ञानेन्द्रलाई दरबारबाटै जनताले लखेट्ने अभिव्यक्ति दिनु दुखद भएको भन्दै उहांले प्रचण्डलाई सच्चिन सुझाव समेत दिनुभयो ।
कार्यक्रममा नागरिक संघर्ष समिति रुपन्देहीका संयोजक वजिर थापाले ज्ञानेन्द्रलाई जनताले नागार्जुन दरबारबाट लखेट्ने नभएर प्रचण्डलाई आफ्नै कार्यकर्ताले लखेट्ने दिन आउने चेतावनी दिनुभयो ।
आफ्नै पुर्व कार्यकर्ता पदम कुँवरले गालामा थप्पड हानेको र पुर्व लडाकु लेनिन बिष्टले अन्तर्राष्ट्रिय अदालतमा मुद्धा हालेको स्मरण गराउदै थापाले दरबारमा चुपचाप बसेका पुर्व राजा ज्ञानेन्द्रबिरुद्ध जथाभावि अभिव्यक्ति नदिन चेतावनी दिनुभयो ।
गोरक्ष राष्ट्रिय जागरण अभियान नेपालका राजनीतिक संयोजक रुपसिंह थापाको सभापतित्वमा भएको पत्रकार सम्मेलनको सञ्चालन नागरिक संघर्ष समितिका सह संयोजक प्रदिप सेरचनले गर्नुभएको थियो ।