संसार पोष्ट
बुटवल, २२ साउन । नेपाल कम्युनिष्ट पार्टी (नेकपा)का महासचिव बिष्णु पौडेलले सुकुम्बासी र अव्यवस्थित बसोवासीको समस्यालाई दीर्घकालीन रुपमै समाधान गर्नेगरी सरकारले काम अगाडि बढाएको बताउनु भएको छ ।
उहांले सुकुम्बासी र अव्यवस्थित बसोवासीको समस्या दीर्घकालीन रुपमै समाधान गर्नेगरी काम भईरहेको बताउनु भयो ।
बुटवल उपमहानगरपालिका वडा नम्बर २ को नव निर्मित वडा कार्यालय भवनको बुधबार बिहान उद्घाटन गर्दै यस क्षेत्रका प्रतिनिधिसभा सदस्य तथा पूर्व अर्थ मन्त्री समेत रहनुभएका महासचिव पौडेलले कोदाले र बिटौरी जग्गाको समस्या समाधानका लागि काम अगाडि बढिसकेको र केही समयमा नै समाधान हुने जानकारी गराउनु भयो ।
कार्यक्रममा प्रदेश सांसद तथा पूर्व नगर प्रमुख भोजप्रसाद श्रेष्ठले बुटवल उपमहानगरपालिकाले नमुना काम गरिरहेको बताउदै बुटवललाई व्यवस्थित बिकास गर्दै लैजान सके नेपालकै नमूना स्थान बन्ने उल्लेख गर्नुभयो ।
बुटवल उपमहानगरपालिका प्रमुख शिवराज सुवेदीले बुटवलको विकासका लागि प्राथमिकताका आधारमा योजना छनौट गरिएको भन्दै सेवाग्राहीलाई पनि सहज र छरितो सेवा प्रवाह गरिएको दाबि गर्नुभयो ।
कार्यक्रममा उपमहानगरपालिका उपप्रमुख गुमादेवी आचार्य, वडा अध्यक्ष रमेश नेपाल, सदस्य खगिसरा गुरुङ, समाजसेबि महेश्वर प्रसाद श्रेष्ठ लगायतले बोल्नु भएको थियो ।
एक करोड ४० लाखको लागतमा निर्माण भएको वडा नम्वर दुईको वडा कार्यालय तीन तलाको छ ।
नेकपाका महासचिब पौडेलले बुधबार नै वडा नं. २ मा करिव २० लाख रुपैयाको लागतमा निर्माण गरिने जेष्ठ नागरिक मिलन केन्द्रको समेत शिलान्यास गर्नुभएको छ ।
