संसार पोष्ट
बुटवल, २१ साउन । प्रदेश नं ५का प्रदेशसभा सदस्यहरुले बर्षा सकिन लाग्दा समेत किसानले मलखादको चरम अभाव भोग्नु परेको भन्दै तत्काल मलखादको व्यवस्था गर्न माग गरेका छन् ।
मंगलबार बसेको प्रदेशसभाको बैठकको बिशेष समयमा बोल्ने अधिकांस प्रदेशसभा सदस्यहरुले मलखादको अभावको बिषयमा सरकारको ध्यानाकर्षण गराएका हुन् ।
प्रदेशसभाको बैठकमा पटक÷पटक मलखादको अभावबारे आवाज उठाउदै आएपनि सरकारले सुनुवाई नगरेको भन्दै प्रदेशसभा सदस्यहरुले किसानहरुलाई तत्काल मलखादको व्यवस्थापन गर्न माग गरे ।
कृषि प्रधान मुलुकमा मलखाद र बिउ बिजनको अभावहुन दुखद भएको भन्दै उनीहरुले समस्या समाधानकालागि संघीय सरकारसँग पहल गर्नुपर्नेमा जोड दिए ।
प्रदेशसभाको मंगलबारको बैठकमा प्रदेशसभा सदस्यहरु दिनेश पन्थी, इन्द्रप्रसाद खरेल, कुलप्रसाद पोखरेल, सहसराम यादव, रुन्दावती शर्मा, भोजप्रसाद श्रेष्ठलगायतले बिशेष समयमा बोल्दै प्रदेश सरकारको ध्यानाकर्षण गराउनुभएको हो ।
प्रदेशसभाको मंगलबारको बैठकले सडक, सवारी, यातायात तथा परिवहन सम्बन्धमा व्यवस्था गर्न बनेको विधेयक र प्रदेश अभिलेख संरक्षण सम्बन्धमा व्यवस्था गर्न बनेको विधेयक पारित गरेको छ भने मुख्यमन्त्री शंकर पोखरेलले सुशासनको प्रत्याभुति गर्ने सम्बन्धमा व्यवस्था गर्न बनेको विधेयक पेश गर्नुभयो । मंगलबार कै बैठकमा प्रदेशका उद्योग पर्यटन, वन तथा वातावरण मन्त्री लिला गिरीले गत आर्थिक बर्षमा मन्त्रालयले गरेको कार्यप्रगतिबारे सदनलाई जानकारी गराउनुभएको थियो ।
