बुटवल । अर्थमन्त्री डा.प्रकाशशरण महतले नयाँ मौद्रिक नीतिले शिथिल अर्थतन्त्रलाई चलायमान गराउने बताउनुभएको छ । नेपाल राष्ट्र बैंकले जारी गरेको नयाँ मौद्रिक नीतिले बैंकहरुको ब्याजदर खुकुलो बनाएकाले निजी क्षेत्रमा पुंजी प्रवाह बढ्न गई लगानीको वातावरण सहज हुने बताउनु भयो ।
‘हिजो मात्रै नयाँ मौद्रिक नीति सार्वजनिक भएको छ । मौद्रिक नीतिले व्याजदर कम भए पछि लगानी बढ्छ । यसले गर्दा सुस्ताएको अर्थतन्त्र अब चलायमान हुन्छ ।’– अर्थमन्त्री महतले भन्नुभयो ।
सोमबार नेपाल प्रेस युनियन रुपन्देहीले बुटवलमा आयोजना गरेको पत्रकार सम्मेलनमा बोल्दै मन्त्री महतले व्याजदर कम भएपछि लगानी बढ्ने र रोजगारीमा पनि वृद्धि हुने विश्वास ब्यक्त गर्नुभयो । आफूले तस्करीको सूचना दिनेलाई पुरस्कारको व्यवस्था गरेकाले सय केजी सुन पक्राउ परेको दावी गर्दै अर्थमन्त्री महतले यस प्रकरणमा जरैसम्म पुगेर अनुसन्धान हुने बताउनु भयो ।
सुन बरामद प्रकरणमा अर्थमन्त्री र गृहमन्त्रीले राजीनामा दिनुपर्छ भन्ने कांग्रेस सांसद डा. सुनिल शर्माको अभिव्यक्तिबारे महतले शर्माको अस्पतालले स्वास्स्थ्य वीमा बोर्डको वीमा रकम नपाएका कारण मनपरी बोलेको आरोप लगाउनुभयो ।
मन्त्री महतले पूँजीगत खर्च बढाउनका लागि समयमा नै ठेक्का लगाउनु पर्ने बताउनुभयो । गतवर्ष राजस्व कम उठे पनि यो वर्ष राजस्व धेरै उठ्ने उहांको दावी छ ।
नेपाली काङ्ग्रेसका प्रवक्ता समेत रहनुभएका अर्थमन्त्री महतले पार्टी केन्द्रीय समितिको बैठक लाइभ गर्दा यथार्थ कुरा बाहिर आएको बताउनुभयो ।
पत्रकार सम्मेलन नेपाल प्रेस युनियन रुपन्देहीका सभापति कबिन्द्र नेपालको अध्यक्षता र सचिव कपिल ज्ञवालीको सन्चालनमा भएको थियो ।
