दाङ । नेपाली कांग्रेस लुम्बिनी प्रदेश समितिले आगामी भदौ महिनामा प्रदेश सम्मेलन गर्ने भएको छ । नेपाली कांग्रेस लुम्बिनी प्रदेश समितिको दाङको भालुवाङमा बसेको बैठकले भाद्र महिना मसान्त भित्र प्रदेश सम्मेलन गर्ने निर्णय गरेको हो ।
सम्मेलनमा प्रदेश समितिका पदाधिकारी, सदस्य, प्रदेश क्षेत्रीय सभाका सभापति एवं सम्मेलन प्रतिनिधिहरू सहभागि हुने छन् ।
नेपाली कांग्रेस लुम्बिनी प्रदेश सभापति अमरसिंह पुनले लुम्बिनी प्रदेश सरकारलाई थप सशक्त र जनमुखी बनाउनको लागि जनभावना अनुरूप कार्यक्रम निर्माण र परिचालन गर्नको लागि सरकार र पार्टीबीच समन्वयका साथ अगाडी बढ्ने निर्णय गरेको बताउनुभयो ।
कांग्रेस लुम्बिनीले भातृ तथा शुभेच्छुक संस्थाहरूमा पदाधिकारी तथा सदस्य मनोनयन गर्दा सम्बन्धित तहका समितिको सिफारिसमा मात्र गर्न पनि केन्द्रीय समितिलाई अपिल गरेको छ ।
प्रदेश सभा क्षेत्रका क्षेत्रीय सभापतिहरूलाई पार्टीको नीति र समसामयिक राजनीतिको विषयमा प्रशिक्षण दिने निर्णय गरेको कांग्रेस लुम्बिनीले विभिन्न विभागहरूलाई पूर्णता दिँदै तल्लो इकाईसम्म पार्टीको परिचालन संयन्त्रलाई प्रभावकारी बनाउने निर्णय समेत बैठकले गरेको कांग्रेस लुम्बिनीको कोषाध्यक्ष प्रकाश रानाले जानकारी दिनुभयो ।
