भैरहवा । जिल्ला प्रहरी कार्यालय रुपन्देहीले ठुलो परिमाणमा मोवाईल, युरिया मल र चामल (खाद्यान्न) बरामद गरेको छ ।
यही जेठ २३ गते राती भारतबाट नेपालतर्फ भन्सार छली अबैधरुपमा ल्याउंदै गरेको अवस्थामा बुटवल उप–महानगरपालिका वडा नं. ७ राजमार्ग चौराहामा गस्तीमा खटिएको प्रहरी टोलीले विभिन्न ब्राण्डका ३७ थान मोबाईल बरामद गरेको छ ।
आइफोन मोवाईल थान २, रेडमी मोवाइल थान १५, सामसुङ मोवाइल थान ८, ओप्पो मोवाइल थान ४, टेक्नो मोवाइल थान १, इन्फिनिक्स मोवाइल थान १, पोको मोवाइल थान १, नोकिया लेनेभो मोवाइल थान २ र मोटो भिभो मोवाइल थान २ बरामद गरिएको प्रहरीले जनाएको छ ।
८ लाख ३० हजार मूल्य बराबरका मोवाइलहरु वेवारिसे अवस्थामा फेला पारी स्थानीय मानिसहरुको रोहवरमा वरामद गरी आवश्यक कारवाहीको लागि भैरहवा भन्सार कार्यालय वेलहियामा बुझाइएको प्रहरीले जनाएको छ ।
यस्तै प्रहरीले भन्सार छली अवैधरुपमा भारतबाट नेपाल तर्फ ल्याई सडक किनारामा लुकाई छिपाई राखेको अवस्थामा ५० किलो तौलका ३४० बोरा युरिया र ६४ बोरा चामल बरामद गरेको छ ।
४ लाख ३२ हजार मूल्य बराबरको युरिया र चामल लुम्बिनी साँस्कृतिक नगरपालिका ३ खुनगाईबाट स्थानीय मानिसहरुको रोहवरमा वरामद गरी आवश्यक कारवाहीको लागि भैरहवा भन्सार कार्यालय वेलहियामा बुझाइएको रुपन्देही प्रहरीले जनाएको छ ।
