बुटवल । लुम्बिनी प्रदेश सभाले बुटवलका विभिन्न संघसंस्थालाई सम्मान गरेको छ । लुम्बिनी प्रदेश सभाको छैठौं स्थापना दिवसको अवसरमा लुम्विनी प्रदेशको अस्थायी राजधानी बुटवलमा प्रदेश सभा स्थापनाका लागि उल्लेखनीय योगदान गरेका बुटवलका सामाजिक संघसंस्थालाई प्रदेश सभाले सम्मान गरेको हो ।
शनिबार प्रदेश सभा परिषर दाङ्गको देउखुरीमा आयोजित समारोहमा प्रदेश सभा स्थापनाका लागि आफ्नो भवन सहितका पूर्बाधार उपलब्ध गराएर महत्वपुर्ण योगदान पुर्याएका पश्चिमाञ्चल पेट्रोलियम डिलर्स एशोसियशन, बुटवल उद्योग वाणिज्य सघं, बुटवल महिला जेसिज र मानव सेवा धर्म समितिलाई प्रदेश सभाले सम्मान गरेको हो ।
प्रदेश सभा स्थापना गर्दा पश्चिमाञ्चल पेट्रोलियम डिलर्स एशोसियसनको भवनमा एमाले संसदीय दलको कार्यालय र बुटवल उद्योग वाणिज्य संघको सभाहलमा प्रदेश सभा तथा कार्यालय भवनमा प्रदेश सभा सचिवालय सञ्चालन भएको थियो । त्यस्तै बुटवल महिला जेसिजको भवनमा पुस्तकालय, नेपाली कांग्रेस र अन्य विभिन्न पार्टीका संसदीय दलको कार्यालय तथा मानव सेवा धर्म समितिको भवनमा विषयगत समितिको कार्यालय र परिषरमा पार्किङ व्यवस्थापन गरिएको थियो ।
कार्यक्रममा लुम्विनी प्रदेश प्रमुख अमिक शेरचन, मुख्यमन्त्री लिला गिरी र सभामुख तुलाराम घर्ती मगरले सहयोग गर्ने संघ संस्थालाई कृतज्ञता पत्र सहित दोसल्ला ओढाएर सम्मान गर्नु भएको थियो । सम्मान कार्यक्रममा संस्थागत प्रतिनिधित्व गर्दै पश्चिमाञ्चल पेट्रोलियम डिलर्स एशोसियसनका कोषाध्यक्ष विशाल गैरे, बुटवल उद्योग वाणिज्य संघका अध्यक्ष उज्ज्वल कसजु र अन्य संस्थाका प्रतिनिधिले सम्मान ग्रहण गरेका थिए ।
