भैरहवा, २६ साउन । तिव्र गतिमा सवारी चलाउनेहरुलाई ट्राफिक प्रहरीले कार्वाही गर्न शुरु गरेको छ । जिल्ला ट्राफिक प्रहरी कार्यालय रुपन्देहीले तिव्र गतिमा सवारी चलाउनेहरुका लागि ओभर स्पिड डिटेक्सन ‘राडार गन’को माध्यमबाट कार्वाही गर्न शुरु गरेको हो ।
ट्राफिक प्रहरीले बिभिन्न बहाना गरेर जरिवानाबाट जोगिन खोज्नेहरुको लागि यो ‘राडार गन’ ले प्रमाण पनि दिने गरेको छ ।
ओभर स्पिड डिटेक्सन ‘राडार गन’ ले करिब १ किलोमिटर परबाट नै तिव्र गतिमा आउने सवारी साधनलाई पहिचान गर्छ र यसको जानकारी ट्राफिक प्रहरीलाई दिन्छ । ट्राफिक प्रहरीका अनुसार राडार गनले तिव्र गतिमा चल्ने सवारी साधनको नम्बर प्लेट सहितको फोटो खिचेर यसको गति सहितको विवरण स्टोरेज गरेको हुन्छ । जसलाई तुरुन्तै प्रिन्ट समेत गरेर प्रमाणको लागि सवारी धनीले लैजान सक्ने ब्यवस्था समेत गरिएको छ ।
सडक बिभागको मापदण्ड अनुसार राजमार्गमा अधिकतम ६० किलोमिटर प्रतिघण्टाको गतिमा सवारी साधन चलाउन पाईने नियम छ । त्यो भन्दा बढी गतिमा चल्ने सवारी साधनलाई प्रहरीले कार्यवाही अभियान चलाएको छ । जिल्लामा हुने दुर्घटना मध्ये सबै भन्दा बढी तिव्र गतिको कारण हुने भएकोले तिव्र गति नियन्त्रण गर्न ट्राफिक प्रहरीले यो अभियान चलाएको जिल्ला ट्राफिक कार्यालयका प्रमुख केशव केसीले जानकारी दिए ।
जिल्लामा भएका दुर्घटनाको करिब ९० प्रतिशत दुर्घटना तिव्रगतिकै कारण भएको देखिएको र तिव्रगतिका कारण हुने दुर्घटना न्यूनिकरणका लागि प्रदेश ट्राफिक प्रहरी कार्यालयबाट राडार गन माग गरिएको प्रहरी निरीक्षक केसीले बताए ।
अभियान लागु गर्नु पूर्व ट्राफिक प्रहरीले स्थानीय सञ्चारमाध्यमहरुबाट यस बारे जानकारी गराएको थियो । अहिलेलाई सचेत गराउनका लागि तिव्र गतिमा सवारी साधन चलाउने लाई ट्राफिक प्रहरी रु. ५ सय मात्र जरिवाना काट्ने गरेको छ ।
यही साउन २४ गते देखि सुरु गरिएको अभियानको पहिलो दिन ३२ जना, दोश्रो दिन ३८ जना र तेश्रो दिन आज २६ गते ४९ जनालाई तिव्रगति चलाएको कारण कार्यवाही स्वरुप जरिवाना गरिएको प्रहरी निरीक्षक केसीले जनाए । रुपन्देहीमा गत आर्थिक बर्षमा १ सय ७२ वटा दुर्घटना मध्ये १ सय ५२ वटा दुर्घटनाहरु तिव्र गतिकै कारण भएको ट्राफिक प्रहरीको तथ्यांक छ । यसले तिव्र गतिमा सवारी चालकलाई मात्र हैन अन्य चालक, पैदलयात्री लगायतलाई पनि जोखिम भएकोले तिव्रगतिमा सवारी नचलाउन प्रहरीले अपिल गरेको छ ।
