बुटवल, २६ साउन । सिद्धार्थ राजमार्ग अन्तर्गतको बुटवल–पाल्पा सडक खण्डबाट एक स्कार्पियो जीप तिनाउ नदिमा खसेको छ । आज(मंगलबार) विहान करिब १० बजे सिद्धबाबादेखि केहि अगाडी हेडबक्स नजिक सडकबाट उक्त जीप नदीमा खसेको हो ।
पाल्पाबाट बुटवलतर्फ आउँदै गरेको बा १८ च ७३३६ नम्बरको जीपमा चार जना यात्रु सवार रहेको लुम्बिनी प्रदेश ट्राफिक प्रहरी कार्यालयका प्रहरी निरीक्षक मधु नेपालले बताउनु भयो । उहांका अनुसार जीप दुर्घटनामा परी जीपका चालक गंगा दराई सहित बाबुराम पाण्डे, विनोद पाण्डे र अमित बस्याल घाईते भएका छन् । घाईते चारै जनालाई उद्धार गरी उपचारका लागि लुम्विनी प्रादेशिक अस्पताल बुटवलमा भर्ना गरिएको प्रहरी निरीक्षक नेपालले बताउनु भयो । उनीहरु पाल्पा तिनाउ गाउँपालिका बाट बुटवल आउने क्रममा जीप नदिमा खसेको हो । प्रहरीका अनुसार घटनाको विस्तृत विवरण आउन बाँकी छ ।
