बुटवल, १ साउन । रुपन्देहीको तिलोत्तमा नगरपालिका भलवारीका रुप कार्कीले अमेरिकामा भारत्तोलनमा स्वर्ण पदक प्राप्त गर्नुभएको छ । हाल अमेरिकाको डिसी महानगर क्षेत्रमा बसोबास गर्दै आएका भारत्तोलक कार्कीलाई स्वर्ण पदक प्राप्त भएको हो । कर्कीलाई भर्जिनियामा आयोजना भएको युएसपिएलमा आफ्नो वजन र वर्गमा स्वर्ण पदक प्राप्त भएको हो । गत जुलाई १३ का दिन ५०÷५४ बर्ष उमेर समूह र २२० पाउण्ड वजनमा कार्कीलाई प्रथम पुरस्कार प्राप्त भएको हो ।
स्वर्ण पदक प्राप्त गरेसंगै कार्की आगामी अक्टोबरमा आयरल्याण्डमा हुने आईपिएल प्रतियोगिताको लागि हुने पूर्व योग्यता(प्रि क्वालिफाई) का लागि छनोट हुनुभएको छ । यो पूर्व योग्यता प्राप्त भएपछि मात्र आईपिएलको प्रतिस्प्रधामा प्रतियोगिको रुपमा भाग लिन पाइने प्रावधान छ । कार्की यस्मा योग्य भएपछि अहिले आयरल्याण्डको लागि तयारीमा जुट्नुभएको छ ।
भारत्तोलक कार्कीले यस अघि ४४÷४९ बर्ष उमेर र २२० पाउण्ड वजन समूहमा सन् २०१७ मा एटलान्टामा भएको युएसपिएल प्रतियोगितामा समेत स्वर्ण पदक जितिसक्नुभएको छ । अमेरिकाको एटलान्टामा सम्पन्न भएको प्रतियोगिता नै यो बर्ष आयरल्याण्डमा हुने छ ।
कार्की ड्रग टेस्टेड (कृतिम रुपमा शारीरिक बल वृद्धि गर्न ओखति प्रयोग नगर्ने बिधि ) खेलाडी हुनुहुन्छ भने २०१९ को आईपिएल प्रतियोगितामा पनि ड्रग टेस्टेडको रुपमा आयरल्याण्ड जादै हुनुहुन्छ ।
कार्की नेपालबाट अमेरिका गएदेखि नै भारत्तोलनको नियमित प्रशिक्षणमा व्यस्त रहदै आउनुभएको छ । भारोत्तलनमा थुप्रै पदक प्राप्त गरिसक्नुभएका कार्की अन्तर्राष्ट्रिय ख्याति प्राप्त भारत्तोलक हुनुहुन्छ ।
पछिल्लो समय कार्कीका छोरा रुपेश कार्की पनि भारत्तोलन खेलमा सक्रियता पुर्वक लाग्नुभएको छ । आफ्नो वर्गमा रुपेशलाई समेत स्वर्ण पदक प्राप्त भएको छ ।
