नवलपरासी, ५ माघ । नेपाली काँग्रेस नवलपरासीले सूचना प्रविधि विधेयक फिर्ता लिन माग गरेको छ ।
आइतबार नेपाली काँग्रेस नवलपुरका सभापति विष्णु लामिछाने सहितको टोलीले जिल्ला प्रशासन कार्यालय नवलपुर मार्फत प्रधानमन्त्री केपी शर्मा ओलीलाई ज्ञापन पत्र बुझाउँदै सूचना प्रविधि विधेयक खारेज गर्न माग गरेको हो ।
ज्ञापन पत्रमा नेपालको संविधान २०७२ ले व्यवस्था गरेको मानव अधिकार र नागरिकको अभिव्यक्ति स्वतन्त्रतालाई हत्या गरी बहुमतको आधारमा पारित गरिएको विधेयक तत्काल फिर्ता गरी संशोधन गर्न माग गरिएको छ ।
ज्ञापन पत्रमा सरकारले नागरिकको फोन समेत ट्यापिङ्ग गरी दैनिक जीवन यापनलाई त्राहिमाम बनाउने, निरंकुश व्यवस्थामा समेत व्यङ्ग्य मार्फत नागरिकहरुले आफ्नो अभिव्यक्ति प्रस्तुत गर्न पाउने सत्यतथ्यलाई विर्सेर सरकारले सामाजिक संजालमा कसैलार्ई व्यङ्ग्य गरे पाँच बर्ष जेल र १५ लाख जरिवाना तिर्नु पर्ने प्रावधानले संविधान प्रदत्त नागरिकको अधिकार र व्यङ्ग्य गर्न पाउने नागरिक स्वतन्त्रता कुण्ठित गरिन खोजिएको उल्लेख गरिएको छ ।
सूचना विधेयक फिर्ता गरी सरोकारवालाको सहभागिता र छलफलमा संशोधन नगरिए आन्दोलनमा उत्रिने चेतावनी समेत नेपाली काँग्रेसले ज्ञापनपत्र मार्फत दिएको छ ।
