बुटवल । वी.पी. कोइराला अध्ययन प्रतिष्ठान बुटवल–७ रुपन्देहीद्वारा आयोजित नगरस्तरीय वक्तृृत्वकला प्रतियोगिता सम्पन्न भएको छ । ७५ औँ प्रजातन्त्र दिवसको अवसरमा समाजवाद, वी.पी.र वर्तमान राजनीति, समाजवाद विषयमा शनिवार भएको प्रतियोगितामा मणिमुकुन्द सेकेन्डरी स्कूल बुटवल ११ की सृष्टि कँडेल प्रथम भइन् ।
उनले नगद १२ हजारसहित प्रमाणपत्र प्राप्त गरेको विपि कोइराला अध्ययन प्रतिष्ठानका सचिव खिमानन्द भट्टराईले जानकारी गराउनुभयो । यस्तै ज्ञानपुञ्ज इङलिश बोर्डिङ स्कुलका चिरन भुसाल द्धित्तीय, एभरेष्ट माविकी नेहारिका ज्ञवाली तृतीय, नविन औद्योगिक कदर बहादुर रिता माविका गोेविन्द भण्डारी र इडन इङलिश बोर्डिङ स्कुल कक्षा ६ मा अध्ययनरत छात्रा क्रिष्टा अर्याल सान्त्वना भएका सचिव भट्टराईले बताउनुभयो ।
उनीहरुले क्रमशः ८ हजार, ५ हजार र २ हजार ५०० सहित प्रमाणपत्र प्राप्त गरे । वक्तृृत्वकला प्रतियोगितामा विजयी विद्यार्थीहरुलाई पुरस्कार तथा प्रमाण पत्र प्रदान गर्दै तिलोत्तमा नगरपालिका प्रमुख रामकृष्ण खाँणले विद्यार्थीहरुलाई अतिरिक्त क्रियाकलापमा पनि सहभागि गराउनु पर्ने बताउनुभयो । मानिस सफल हुनका लागि हरेक कुरामा ज्ञान आवश्यक रहेकाले यस्ता प्रतियोगिताले विद्यार्थीलाई अघि बढ्न सहयोग पुग्ने उहांले बताउनुभयो ।
सोही कार्यक्रममा बोल्दै वी पी कोइराला अध्ययन प्रतिष्ठानका अध्यक्ष युवराज गिरीले विद्यार्थीहरुको अन्तरनिहीत क्षमतालाई बाहिर ल्याउनका लागि कार्यक्रमको आयोजना गरिएको बताउनुभयो । अहिलेका विद्यार्थीले नै भविष्यमा देश हाक्ने भएकाले विद्यार्थीहरुलाई सानैदेखि हरेक कुरामा सक्षम बनाउँदै लैजानुपर्ने सबैको दायित्व भएको उहांले बताउनुभयो ।
कार्यक्रममा नेपाली कांग्रेस रुपन्देही क्षेत्र नम्वर २ का पूर्व सभापति पर्शुराम ढकाल, प्रतिष्ठानका उपाध्यक्ष लक्ष्मण आचार्य क्षेत्री र कृष्णप्रसाद ज्ञवालीले प्रतिष्ठानले विद्यार्थीहरुमा रहेको अन्तरनिहित क्षमतालाई प्रस्फुटन गराउने उद्देश्यले प्रतियोगिताको आयोजना गरिएको बताउनुभयो ।
प्रतियोगिताको निर्णायकको रुपमा डा.शालिकराम पौड्याल, डा. प्रेम तिवारी र रीता ढकाल रहनुभएको थियो । उक्त वक्तृृत्वकला प्रतियोगितामा सामुदायिक र संस्थागत विद्यालयका गरी १६ जनाले सहभागिता जनाएका थिए ।
