काठमाडौं । कतारका राजा अमिर शेख तमिम बिन हमाद अल थानी नेपाल भ्रमणमा आउने दिन सरकारले भोली (मंगलबार) सार्वजनिक विदा दिने निर्णय गरेको छ । सोमबार बसेको मन्त्रीपरिषद बैठकले दुई दिने नेपाल भ्रमणमा आउन लागेका कतारका राजाको स्वागत सम्मानमा मंगलबार सार्वजनिक विदा दिने निर्णय गरेको हो ।
राष्ट्रपति रामचन्द्र पौडेलको निमन्त्रणामा राजकीय भ्रमणमा नेपाल आउन लागेका कतारी राजालाई राष्ट्रपति पौडेलले त्रीभुवन अन्तर्राष्ट्रिय विमनस्थलमा स्वागत गर्नुहुने कार्यक्रम छ । एसिया क्षेत्रका तीनवटा मुलुकको भ्रमणमा निस्केका कतारका राजा अल थानी फिलिपिन्सबाट बंगलादेश हुँदै मंगलबार अपराह्न ५ बजे नेपाल आउनुहुनेछ ।
कतारी राजालाई राष्ट्रपति पौडेलले त्रिभुवन अन्तर्राष्ट्रिय विमानस्थलमा स्वागत गर्नुहुनेछ भने त्यसपछि थानी सिधै होटल सोल्टी पुग्नुहुनेछ । त्यसपछि थानी राष्ट्रपति पौडेलसँग भेट गर्न शीतल निवास जाने कार्यक्रम तय भएको छ ।
भोली मंगलबार नै राष्ट्रपति पौडेलले कतारी राजाको सम्मानमा होटल सोल्टीमा रात्रीभोजको आयोजना गर्नुभएको छ ।
भ्रमणको दोस्रो दिन बुधबार थानी र प्रधानमन्त्री पुष्पकमल दाहाल प्रचण्डबीच द्विपक्षीय भेटवार्ता तथा केही सम्झौता र समझदारीमा हस्ताक्षर हुने कार्यक्रम तय भएको छ । त्यसपछि कतारी राजा थानी बुधबार वेलुका कतार फर्किने कार्यतालिका छ ।
