तिलोत्तमा, वैशाख १५ । नेकपा एमालेले तिलोत्तमा नगरपालिकामा आगामी तीन वर्षभित्र सबै घर परिवारलाई स्वच्छ खानेपानी उपलब्ध गराउने प्रतिबद्धता जनाएको छ । यहीँ वैशाख ३० गते हुने स्थानीय तह निर्वाचनको सन्दर्भमा पार्टीले आगामी ३ वर्षभित्र स्वच्छ खानेपानी शतप्रतिशत घर परिवारलाई उपलब्ध गराउने प्रतिबद्धता जनाएको हो । सामान्यतयाः ओभरहेड टंकीबाट वितरण गरिने खानेपानीलाई स्वच्छ खानेपानी मान्ने गरिन्छ ।
पार्टीले प्रकाशन गरेको प्रतिबद्धता पत्रमा ओभरहेड टंकी निर्माण र पाइपलाइन विस्तार गर्न संघ तथा प्रदेश सरकारबाट समेत लगानी सुनिश्चित गरी खानेपानी तथा सरसफाई उपभोक्ता संस्थालाई आवश्यक सहयोग र सहजीकरण गरिने उल्लेख छ । तिलोत्तमा नगरपालिकामा आधारभूत स्तरको खानेपानीको पहुँच सबै नगरबासीको पहुँचमा रहेको छ । शंकरनगर खानेपानी उपभोक्ता तथा सरसफाई संस्थाका अध्यक्ष झविन्द्र भण्डारीका हाल अनुसार तिलोत्तमाका झण्डै ८० प्रतिशत बासिन्दा स्वच्छ खानेपानीको पहुँचमा छन् ।
तिलोत्तमाको धेरै जनसंख्या रहेको साविकका शंकरनगर, आनन्दवन, करहियाका अधिकांश घर परिवार स्वच्छ खानेपानीको पहुँचमा पुगेका छन् । हाल निर्माणको क्रममा रहेका आयोजना सम्पन्न गरी थप ओभरहेड टंकी र पाइप विस्तार गरेर सबै नगरबासीको पहुँच स्वच्छ खानेपानीमा पुर्याउने नेकपा एमालेले जनाएको छ । तिलोत्तमा नगरपालिकामा हाल खानेपानी वितरण गर्दै आएका र निर्माणको क्रममा रहेका शंकरनगर, शंकरनगर—आनन्दवन, करहिया, करहिया—मक्रहर, मधवलिया, टिकुलिगढ, भुल्के, भूपू सैनिक, गंगोलिया खानेपानी उपभोक्ता तथा सरसफाई संस्था रहेका छन् । यी आयोजनाहरुले आवश्यकता अनुरुप सेवा विस्तार गर्दै गएका छन् ।
सबैका लागि सुरक्षित तथा उपभोक्ता मैत्री मूल्यमा पिउने पानीको सर्वसुलभता र समतामूलक पहँुचका लागि प्राथमिकता दिइने एमालेले जनाएको छ । खानेपानी तथा सरसफाई व्यवस्थापनको दिगो विकासका लागि स्थानीय समुदायहरूको सहभागितालाई अझ सबल बनाइने प्रतिबद्धता पत्रमा उल्लेख छ । यस्तै नगरक्षेत्रभित्र ढलको समुचित व्यवस्थाको पहल गरी अब बन्ने नयाँ सडकमा ढल निर्माणसम्बन्धी कार्यलाई प्राथमिकतामा राखिने पनि एमालेले जनाएको छ ।
यसैगरी नगरपालिकाबाट राइट अफ वे निर्धारण गरिएका महत्वपूर्ण सडकहरूको ढल, नाली निर्माणमा प्राथमिकता दिइने एमालेको प्रतिबद्धता पत्रमा उल्लेख छ । एमालेले स्थानीय तह सदस्य निर्वाचनमा नगर प्रमुखमा मोहन चापागाईं तथा उपप्रमुखमा जागेश्वरी चौधरीलाई उम्मेदवार बनाएको छ । उम्मेदवारहरुले प्रतिबद्धता अनुसारको काम हुने जनाएका छन् ।
