स्थानीय सरकार संचालन ऐन विपरित नगर सभा गरेको आरोप
संसार पोष्ट
कपिलवस्तु, ९ साउन । कपिलवस्तु नगरपालिकाका उप प्रमुखले नगर प्रमुख विरुद्ध अदालतमा मुद्दा दर्ता गराउनु भएको छ । उप प्रमुख लक्ष्मी देवी गुप्ता सावले नगर प्रमुख किरण सिंह विरुद्ध मुद्दा दर्ता गराउनु भएको हो । स्थानीय सरकार संचालन ऐन २०७४ को दफा ६७ मा बजेट तथा कार्यक्रम तर्जुमा समितिको व्यवस्था विपरित नगर सभा संचालन गरेको भन्दै उप प्रमुख सावले नगर प्रमुख सिंह विरुद्ध उच्च अदालत तुलसीपुरको बुटवल ईजलासमा मुद्धा दायर गर्नुभएको हो ।
उप प्रमुख गुप्ताले दायर गर्नुभएको मुद्धामा नगर प्रमुख किरण सिंह, प्रमुख प्रशासकीय अधिकृत विमलराज आचार्य र नगर सभालाई विपक्षी बनाईएको छ । स्थानीय सरकार संचालन ऐन २०७४ को दफा ६७ मा बजेट तथा कार्यक्रम तर्जुमा समितिको संयोजक उप प्रमुख हुने व्यवस्था छ । तर सो ऐनको दफा ६७ विपरित नगर प्रमुख अघि बढेको र जवरजस्ती नगर सभा संचालन गरेकाले नगर प्रमुख सहित नगर सभा विरुद्ध उच्च अदालतमा मुद्धा दायर गरेको उप प्रमुख गुप्ताले बताउनु भयो ।
योजना तर्जुमा समितिको संयोजक समेत रहनुभएकी उप प्रमुख गुप्ताले आफुसंग कुनै छलफल नगरि नगर प्रमुखले बजेट बनाएको जिकिर गर्दै मुद्दा मार्फत पांचौ नगर सभाको निर्णय कार्यान्वयन नगर्न नगराउन उच्च अदालत समक्ष माग गर्नुभएको छ । उप प्रमुख गुप्ताले दायर गर्नुभएको मुद्दामा अदालतले यही साउन १५ गतेलाई पेशी तोकेको छ ।
स्थानीय सरकार संञ्चालन ऐन २०७४ को दफा ६७ मा बजेट तथा कार्यक्रम तर्जुमा समितिको संयोजक उपमेयर वा उपाध्यक्ष हुनुपर्ने कानुनी व्यवस्था छ । तर, सोही दफामा उल्लेख गरिएका कार्यमा नगर प्रमुखले हस्तक्षेपकारी भूमिका खेलेको भन्दै उप प्रमुख गुप्ताले असन्तुष्टि जनाउदै आउनुभएको थियो ।
नगरपालिकाको पाचौं नगर सभामा उप प्रमुख गुप्ताले असहमति जनाउँदा जनाउँदै नगर प्रमुख सिंहले जवरजस्ती नीति, कार्यक्रम तथा बजेट पास गरेपछि विवाद उत्कर्षमा पुगेको हो । योजना तर्जुमा समिति मै विमति राख्दै आउनुभएकी उप प्रमुख गुप्ताले नगर कार्यपालिका बैठक, नीति तथा कार्यक्रम र बजेट सहितको कार्यक्रम बहिस्कार गर्नुभएको थियो ।
