बुटवल, ३ साउन । सिद्धार्थ राजमार्गको बुटवल तानसेन सडकखण्डको तानसेन नगरपालिका–८ गौडेपुल नजिकै निरन्तर पहिरो खस्दा दैनिक जसो सडक अवरुद्ध हुदै आएको छ ।
सिद्धार्थ राजमार्ग अन्तर्गत तानसेन ८ स्थित गौडेपुल नजिकै पहिरो खस्दा पहिरोले एउटा ट्रक पुरेको प्रहरीले जनाएको छ । शनिबार बिहानै बुटवलबाट स्याङ्जाका लागि सामान लिइ हिडेको लु १ ख ११७५ नम्बरको मिनी ट्रक पहिरो जाने स्थानमा फसेको र माथिबाट पहिरो आई पुरेको प्रहरीले जनाएको छ ।
जिल्ला प्रहरी कार्यालय पाल्पाका प्रहरी नायब उपरीक्षक मदन गिरीले शुक्रवार राती साढे १० बजे गौडे पुलमा पहिरो खसेको जानकारी गराउनु भयो । उहाँले सो स्थानमा रहेका सवारी साधनलाई सुरक्षित गर्ने क्रममा सडक किनाराको नालीमा फसेको उक्त ट्रक पुनः पहिरो आई पुरिएको बताउनु भयो ।
माथिल्लो भागबाट निरन्तर ढुंगासहितको पहिरो खसेकाले डोजर लगाउन र सडक सुचार गर्न समय लाग्ने उहांले जानकारी दिनुभयो । बिहिबार र शुक्रवार पहिरो सफा गरेको र पहिरो खस्ने क्रम नरोकिएकाले जोखिम कायमै रहेको उहांले बताउनु भयो ।
सिद्धार्थ राजमार्ग अहिले पनि अबरुद्ध छ । वुटवल र तानसेन दुवै तर्फबाट जेसीवी प्रयोग गरी वाटो खुलाउने प्रयास भईरहेको प्रहरीले जनाएको छ ।
यसैबीच पश्चिम पाल्पा रैनादेवी छहरा गाउँपालिका वडा नं. ३, पुट्टाचउर स्थित रिडीखोला तर्ने क्रममा अर्घाखाँची जिल्ला सन्धिखर्क नगरपालिका वडा नं. ८ किमडाँडाका ४० वर्षिय देबबहादुर मुखियालाई खोलाले बगाएको पाल्पाका प्रहरी नायव उपरीक्षक मदन गिरीले जानकारी दिनुभयो ।
