आज देखि सोह्र श्राद्ध अर्थात् पितृ पक्ष आरम्भ

बुटवल । आज (सोमबार) देखि सोह्र श्राद्ध अर्थात् पितृ पक्ष आरम्भ भएको छ । हिन्दु धर्मावलम्बीहरुले दिवंगत पितृहरुको सम्झनामा गर्ने वार्षिक श्रद्धाञ्जली पर्व सोह्रश्राद्ध आज आश्वीन कृष्ण प्रतिपदा तिथि देखि शुरु भएको हो ।
यस अवधिभर दिवंगत पितृप्रति कृतज्ञता प्रकट गर्दै तर्पण, सिदादान र पिण्डदान गर्ने धार्मिक परम्परा रहिआएको छ ।
चाडपर्व, यज्ञ तथा ठूलाकार्य गर्नु अघि पितृलाई श्रद्धा भक्तिका साथ सम्झिने वैदिक सनातन हिन्दू परम्पराअनुसार सोह्रश्राद्ध गर्ने गरिएको हो । सोह्रश्राद्धमा पितृले आफ्ना सन्तानबाट तर्पण, पिण्डको आश गरिरहेका हुन्छन् भन्ने शास्त्रीय मान्यता छ । यसरी सोह्रश्राद्ध गर्नाले पितृप्रतिको दायित्व पूरा हुनाका साथै पितृऋणबाट पनि मुक्त भइन्छ भन्ने धार्मिक विश्वास छ ।
यो समयमा पनि कारणवश सोह्र श्राद्ध गर्न नसकिएमा कार्तिक कृष्ण औँसी अर्थात् लक्ष्मीपूजाका दिन गर्न सकिन्छ । कार्तिक कृष्ण औँसीमा पनि गर्न नसकिने भएमा वृश्चिक सङ्क्रान्ति अर्थात् मङ्सिरसम्म जुराएर गर्न सकिने धर्मसिन्धु नामक शास्त्रीय ग्रन्थमा उल्लेख गरिएको छ ।
पितृ पक्षको समाप्तिसँगै दुर्गा पक्ष अर्थात् बडा दसैँ सुरु हुन्छ । बडादसैँ मनाउनुअघि पितृ तृप्तिका लागि सोह्र श्राद्ध गर्ने गरिएको धर्मशास्त्रीय मत छ । ठूला पर्व वा चाड मनाउनुअघि पितृतृप्तिको कर्म गर्ने वैदिक सनातनी परम्परा छ ।