देवदह । नेपाली कांग्रेसका महामन्त्री गगनकुमार थापाले ठुलो संघर्षका वाबजुद ल्याईएको संघियता टाउकोले टेकेको भएकोले यसलाई खुट्टाले टेकेको संघियता बनाउनु अहिलेको आवश्यकता भएको बताउनुभएको छ । उहांले संघियताको विकल्प खोज्न नहुने भन्दै संघियतालाई ठिक ढंगले संचालन गर्न नजान्दा समस्या भएको जिकीर गर्नुभयो ।
सरकारमा रहेका मन्त्री र प्रधानमन्त्रीलाई १८÷२० घण्टा काम गर्न उहांले सुझाव दिनुभयो । सरकारको राम्रो कामको प्रचार आफुहरुले गर्ने भन्दै महामन्त्री थापाले सरकारले ठीक समयमा ठीक काम नगरेकै कारण शिक्षकहरु सडकमा उत्रिएको उल्लेख गर्नुभयो । उहांले शिक्षकहरूको माग सम्वोधन गरेर छिटोभन्दा छिटो कक्षा कोठामा फर्काउने वातावरण मिलाउन सरकारलाई आग्रह गर्नुभयो ।
नेपाली कांग्रेस रुपन्देही क्षेत्र नं. १ को क्षेत्रीय सम्मेलनको रुपन्देहीको देवदहमा उद्घाटन गर्दै महामन्त्री थापाले प्रदेशको खर्च घटाउंदै जनप्रतिनिधिको संख्या कम गरी प्रदेशको मुख्यमन्त्री बनाउने पद्धतीमा समेत परिवर्तन आवश्यक रहेको स्पष्ट पार्नुभयो । मुलुकको निर्वाचन प्रणालीमा आमुल परिवर्तन आवश्यक रहेको भन्दै उहांले केन्द्रिय सांसद, प्रदेश सांसद र स्थानीयका जनप्रतिनिधीहरुको संख्यापनि घटाएर खर्च कम नगर्दासम्म जनताको मुलप्रवाहका दलहरु प्रतिको वितृष्णा कम नहुने तर्क गर्नुभयो ।
कांग्रेस र एमालेको गठबन्धनबाट वनेको सरकार बलियो मात्रै भएर पुग्दैन, जनताको विश्वास आर्जन गर्ने गरी काम गर्न नसकेको उहांले खुलासा गर्नुभयो । प्रधानमन्त्री ओली प्रति लक्षित गर्दै महामन्त्री थापाले तावाको विड तातेर हुदैन तावा नै तात्नु पर्ने भन्दै अहिले तावा तताउने काम कमजोर भएको उल्लेखगर्नुभयो ।
महामन्त्री थापाले जनताको भरोसा आर्जन गर्ने गरी कामको गति अगाडी बढाउन सरकारलाई सुझाव दिनुभयो । गणतन्त्रात्मक व्यवस्थामा समस्या रहेको र त्यसको समाधान अपरिहार्य छ भन्दै महामन्त्री थापाले संघियताको विकल्प खोज्नु भनेको राजनैतिक दूर्घटना निम्ताउनु हो भन्नुभयो ।
नेपालको राजसंस्थाको चरित्र नै संबैधानिक भएर बस्न नसक्ने भएको विगतका प्रमाणहरुले देखाएको प्रसंग उल्लेख गर्दै उहांले पछिल्लो समय जनतामा आक्रोश बढिरहेको र राजाबादी समूहले जनतामा रहेको असन्तुष्टीलाई दुरुपयोग गर्ने गरी आगोमा घिउ थप्ने काम गरिरहेको बताउनुभयो ।
कार्यक्रममा नेपाली कांग्रेसका केन्द्रीय सदस्य बालकृष्ण खांण, अब्दुल रज्जाक, भरतकुमार शाह, गंगा शाही, नेपाली कांग्रेस रुपन्देहीका सभापति रामकृष्ण खाँण लगायतले बोल्दै देशमा विकास भएपनि जनताले सोचे र खोजे अनुसारको विकास नभएको कारण जनतामा असन्तुष्टी बढेकोले सरकारले विकासको गतिलाई बढाउनु पर्ने धारणा राख्नुभयो ।
नेपाली कांग्रेस रुपन्देही क्षेत्र नंं १ का क्षेत्रीय सभापति हिरा केसीको सभापतित्वका कार्यक्रम भएको थियो ।
