बुटवल । सत्तारुढ प्रमुख दुई दल नेकपा एमाले र नेपाली कांग्रेसको गठबन्धनलाई हराउँदै रुपन्देहीको तिलोत्तमा नगरपालिका स्थित शंकरनगर वन बिहार तथा अनुसन्धान केन्द्र (वन वाटिका)को अध्यक्षमा नेत्रविक्रम चन्द विप्लव निकट उम्मेदवार विजयी भएका छन् ।
केन्द्रको चौथो अधिवेशनबाट अध्यक्षमा एमाले–कांग्रेस गठबन्धनका उम्मेदवार इन्जिनियर किरण खरेललाई १३५ मतान्तरले पराजित गर्दै विप्लव निकट उम्मेदवार खिमलाल पाण्डे विजयी हुनुभएको हो । अध्यक्षमा निर्वाचित पाण्डे यसअघि उपाध्यक्ष र खरेल कार्यसमिति सदस्य थिए ।
कुल ७७५ मतदाता मध्ये ६६१ मत खसेकोमा पाण्डेले ३६९ मत पाएर निर्वाचित हुँदा खरेलले २३४ मत प्राप्त गर्नुभयो । अध्यक्ष पदकी उम्मेदवार राष्ट्रिय जनमुक्ति पार्टीकी टिकादेवी आलेले ३९ मत पाउनुभयो । अध्यक्षमा निर्वाचित पाण्डेलाई माओवादी केन्द्रले उम्मेदवारी नै फिर्ता लिएर साथ दिएको थियो भने एमाले र कांग्रेसका असन्तुष्ट पक्षले समेत आन्तरिकरुपमा साथ दिएका थिए ।
त्यस्तै उपाध्यक्षमा भने गठबन्धनकै उम्मेदवार मीनप्रसाद देवकोटा ३७८ मत ल्याएर विजयी हुनुभयो भने प्रतिद्वन्दी लेखबहादुर खड्काले १३२ र चन्दा थापाले १०९ मत प्राप्त गर्नुभयो ।
सचिवमा विदुर केसी ३७९ मत सहित विजयी हुँदा एमाले कांग्रेस गठबन्धनकी उम्मेदवार हरिकला अधिकारी (कमला) ले १८८ र हिरामति थापाले ५७ मत प्राप्त गर्नुभयो । कोषाध्यक्षमा गठबन्धनबाटै मनिराम भट्टराई ३८५ मत ल्याएर विजयी हुँदा सौरभ भुषालले १७५ र उदयसिंह थापाले ६३ मत पाउनुभयो ।
२ जना लेखासमिति सदस्यका लागि ६ जना उम्मेदवार रहेकोमा सन्दिप भट्टराईले ३१३ र
विष्णु प्रसाद सुवेदी २११ मत ल्याएर विजयी हुनुभयो । लेखासमिति संयोजकमा गठवन्धनका प्रदिप पराजुली निर्विरोध निर्वाचित हुनुभएको थियो ।
त्यस्तै सदस्यहरुमा विन्दु ढकाल ३०२, शँकर भण्डारी २९७, पार्वती क्षेत्री २८३, सरस्वति बराल २३९, राममाया अर्याल पौडेल २२३, ज्योतिमाया थापा २१३ र लक्ष्मण मल्ल ११२ मत ल्याएर विजयी हुनुभएको छ । सदस्यमा २६ जनाको उम्मेदवारी रहेको थियो ।
