काठमाडौं । स्वतन्त्र विद्यार्थी युनियन (स्ववियु) निर्वाचनअन्तर्गत हालसम्म सार्वजनिक भएको नतिजा अनुसार नेपाली कांग्रेसनिकट नेपाल विद्यार्थी संघ (नेविसंघ) ले ९९ सयवटा क्याम्पसमा सभापति पद जितेको छ ।
पछिल्लो मत परिणामअनुसार नेकपा एमालेनिकट अनेरास्ववियुले ८६ क्याम्पसमा सभापति पद जितेको छ ।
नेविसंघले रूपन्देहीको हरैया बहुमुखी क्याम्पस, यज्ञोदय दुधनाथ थारू बहुमुखी क्याम्पस, लिलाधर घिमिरे छपिया जनता कलेज लगायतका क्याम्पसहरूमा जितेको छ ।
त्यस्तै अनेरास्ववियुले रूपन्देहीको सहिद नारायण पोखरेल बहुमुखी क्याम्पस रामापुर, देवदह आदर्श बहुमुखी क्याम्पस, पाल्पाको माण्डब्य बहुमुखी क्याम्पसलगायतका क्याम्पसहरू जितेको छ ।
यद्यपि रूपन्देहीको देवदह आदर्श बहुमुखी क्याम्पस, पाल्पाको माण्डब्य बहुमुखी क्याम्पसलगायतका केही क्याम्पसहरूमा नेविसंघ र अनेरास्ववियुबीच समझदारीमा नेतृत्व चयन भएको बताइएको छ ।
लुम्बिनी प्रदेशकै महत्त्वपूर्ण क्याम्पसको रूपमा रहेको रूपन्देहीको बुटवल बहुमुखी क्याम्पस, लुम्बिनी बाणिज्य क्याम्पस, सिद्वार्थ क्याम्पस, राममणी बहुमुखी क्याम्पस, भैरहवा बहुमुखी क्याम्पसलगायतका क्याम्पसहरूमा निर्वाचन प्रक्रिया अबरुद्ध भएको छ ।
यज्ञोदय बहुमुखी क्याम्पसमा नेविसंघको प्यानल विजयी
रुपन्देहीको शुद्धोधन गाउँपालिका ३ रमवापुरमा रहेको यज्ञोदय दुधनाथ थारु बहुमुखी क्याम्पसमा नेविसंघको प्यानल विजयी भएको छ ।
बुधबार सम्पन्न स्ववियु निर्वाचनमा संयुक्त प्यानललाई पराजित गर्दै आदेश राना नेतृत्वको नेविसंघको प्यानल विजयी भएको हो ।
रानाले ३१५ मत ल्याएर विजयी भएको क्याम्पसका निर्वाचन अधिकृत भिम प्रसाद सापकोटाले बताउनुभयो । रानाका प्रतिस्पर्धी संयुक्त प्यानलका अन्जिता चौधरीले १४४ मत ल्याएर पराजित भएकी छन् ।
सचिवमा रम्भा थारुले ३०१ मत ल्याएर विजय भइन भने सयुक्त प्यानलबाट अतुल मिश्र १५७ मत ल्याएर पराजित भए । त्यस्तै कोषाध्यक्षमा माधव कुमार कडेल ३२३ मत ल्याएर निर्वाचित भएका हुन् । उनका निकटतम प्रतिद्वन्दी हसिबुन निशाले १५० मत ल्याइ पराजित भइन ।
खुल्ला सदस्यहरुमा किसन थारु, सानिया चालिसे, सुरेन्द्र पाठक, कृष्ण बहादुर लोनिया र अनुराधा कुमारी हरिजन निर्वाचित भएको क्याम्पसले जनाएको छ ।
यस्तै समानुपातिक तर्फ नेविसंघले ५ जना सदस्य र अनेरास्ववियुले २ जना सदस्य प्राप्त गरेको छ । क्याम्पसमा अनेरास्ववियु र अखिल (क्रन्तिकारी)को तालमेल थियो भने नेविसंघ एकल प्रतिस्पर्धामा थियो ।
क्याम्पसमा ५५० जना विद्यार्थी रहेकोमा ४६७ जनाले मतदानमा भाग लिएका थिए भने ४ मत बदर भएको थियो ।
