बुटवल । २३ औं तिलोत्तमा गोल्ड कप फूटवल प्रतियोगिता यहि शनिवार देखि शुरु हुदैछ । रुपन्देही जिल्ला फूटवल संघको आयोजनामा बुटवल देविनगरस्थित एन्फा एकेडेमीको फुटवल मैदानमा प्रतियोगिता संचालन हुनेछ । प्रतियोगिता आयोजना हुने एन्फा मैदानमा तयारीको काम अन्तिम चरणमा पुगेको जनाइएको छ ।
प्रतियोगिता सञ्चालन गरिने मैदानलाई सम्याउने काम सकिएको र दर्शक बस्ने प्याराफिटको सुधार र रँगरोगन तथा मैदान क्षेत्रलाई आकर्षक बनाउने काम भैरहेको संघका सचिव शंकर मल्लाहाले जानकारी गराउनुभयो ।
प्रतियोगितामा सहभागी हुने ८ टिमको टुङ्गो लगाएर टाइसिट समेत तयार भैसकेको छ । संघका अनुसार प्रतियोगितामा आयोजक रुपन्देही–११, चर्च ब्वाइज युनाइटेड, एपिएफ, संकटा एफसी, मच्छिन्द्र फुटवल क्लब, नेपाल पुलिस क्लब, जर्जियन एफसी भारत र एडोर्न गडवाल स्पोर्टिङ कलब भारतको सहभागिता रहने छ । सहभागि ८ टिमलाई दुई समूहमा विभाजन गरि खेल खेलाईने छ ।
जसमा समूह ए मा आयोजक रुपन्देही–११, एपिएफ, संकटा एफसी, जर्जियन एफसी, भारत रहेको छ भने समूह वि मा चर्च व्याइज युनाइटेड, मच्छिन्द्र फुटवल क्लब, नेपाल पुलिस क्लब, र एडोर्न गडवाल स्पोर्टिङ कलब, भारतको टिम रहेको छ ।
प्रतियोगिताको उद्घाटन खेल चैत्र ९ गते आयोजक करेन्ट रुपन्देही–११ र एपीएफकावीच हुने छ । चैत्र १० गते चर्च व्वाइज युनाइटेड र नेपाल पुलिस क्लब, चैत्र ११ गते संकटा एफसी र जर्जियन एफसी, भारत, चैत्र १२ गते मच्छिन्द्र एफसी र एडोर्न गडवाल स्पोर्टिङ कलब, भारतकावीच खेल हुने छ । प्रतियोगिताको फाइनल चैत्र १६ गते हुने छ ।
यशोदा फुड्स प्रा.लि. र त्रिमुर्ति ईण्डष्ट्रिज प्रा.लि. को मुख्य प्रायोजन रहेको प्रतियोगिताको विजेताले उपाधिसहित नगद १२ लाख १२ हजार २ सय २२ रुपैयाँ हात पार्नेछ भने उपविजेताले ६ लाख ६६ हजार ६ सय ६६ रुपैयाँ प्राप्त गर्नेछ ।
त्यस्तै विधागततर्फ उत्कृष्ट हुने सबैले जनही ३१–३१ हजार र ट्रफी पाउने छ भने सर्वश्रेष्ठ खेलाडीलाई एक थान मोटरसाइकल वा स्कुटर प्रदान गरिने छ । प्रतियोगिताका प्रत्येक खेलको म्यान अफ दि म्याच हुने खेलाडीलाई ११ हजार १ सय ११ सहित ट्रफी प्रदान गरिने संघका अध्यक्ष लोक पुनले जानकारी गराउनुभयो । प्रतियोगिताको २२ औं संस्करण मनाङ मस्र्याङ्दी क्लब, काठमाडौंले जितेको थियो ।
तिलोत्तमा गोल्ड कपको हालसम्म आयोजित २२ वटा प्रतियोगितामा सहभागि भएका १५ क्लबले उपाधि जितेका छन् । जसमा तीन वटा उपाधि विदेशी टिमहरु भारतको बम्बई फर्टिलाईजर मुम्बई र महिन्द्रा एण्ड महिन्द्रा तथा क्यामरुनको दाउफिन्स एफसीले जितेका छन् ।
प्रतियोगिताको २०३३ सालमा आयोजित पहिलो संस्करणको उपाधि सिद्धार्थ खेलकुद परिषद् रूपन्देहीले जितेको थियो भने २२ औं संस्करणको (डिफेण्डीङ च्याम्पियन) उपाधि मनाङ मस्र्याङदी क्लब रहेको छ ।
हालसम्म कालिका स्पोर्टिङ क्लब र महेन्द्र पुलिस क्लबले ३–३ पटक जितेर कप कब्जा गरेका छन् भने त्रिभुवन आर्मी क्लब र रूपन्देही ११ ले २–२ पटक जितेका छन् । यो प्रतियोगिता बम्बई फर्टिलाइजर भारत, जनकपुर चुरोट कारखाना, आरएनएसी, महिन्द्रा एण्ड महिन्द्रा मुम्बई, फ्रेन्ड्स क्लब, जावलाखेल युथ क्लब, सिएमसी संकटा, थ्रिस्टार क्लब काठमाडौं, क्यामरुनको दाउफिन्स एफसी र मनाङ मस्र्याङदी क्लबले १–१ पटक जितेका छन् ।
