बुद्ध र लुम्बिनी सम्बन्धि चलचित्र बनाउने उद्देश्यसहित चिनियाँ कलाकार लुम्बिनीमा

लुम्बिनी । बुद्ध र लुम्बिनीसँग सम्बन्धित चलचित्र बनाउने उद्देश्यले चिनियाँ कलाकारहरुको टोली लुम्बिनी आएकोछ ।
चिनिया कलाकारहरुको टोलीले बुद्ध र लुम्बिनीसँग सम्बन्धित चलचित्र बनाउने बिषयमा लुम्बिनी विकास कोषका पदाधिकारी, सदस्य एबम कर्मचारीहरुसंग भेटघाट तथा छलफल गरेको छ ।
‘म कहिल्यै नमरी जीउन चाहन्छु’ नामक चलचित्रको एकतिहाई भाग बुद्धजन्मस्थल लुम्बिनीमा सुटिङ गर्ने योजना रहेको भन्दै निर्माता तथा कलाकारहरुले आईतबार लुम्बिनी विकास कोषमा छलफल गरेका हुन् ।
त्यस अवसरमा लुम्बिनी विकास कोषका कोषाध्यक्ष ढुण्डिराज भट्टराई (सिद्धिचरण)ले बुद्ध र लुम्बिनीको सकारात्मक रुपमा प्रचार गर्ने गरी चलचित्र निर्माण हुने कुराले खुशी तुल्याएको बताउनुभयो । उहांले चलचित्रले चिनका नागरिकहरुमा बुद्ध र लुम्बिनीका बारेमा सकारात्मक प्रभाव पार्ने भन्दै पर्यटन प्रवद्र्धनमा समेत टेवा पुग्ने विश्वास ब्यक्त गर्नुभयो । लुम्बिनीमा चलचित्रको छायांँकनका लागि कानुनले दिएका बिषयमा सक्दो सहजीकरण गर्ने प्रतिबद्धता समेत उहांले जनाउनुभयो ।
छलफलमा कोषका सूचना तथा जनसम्पर्क प्रमुख डा. हरिध्वज राईले भगवान बुद्धले लुम्बिनी भ्रमण गर्दा पनि जीवनमा भएका पापहरु क्षम्य हुने भनी बौद्धशास्त्रमा लेखेको उल्लेख गर्दै बुद्धको सन्देशलाई सहि रुपमा चलचित्रले उठान गर्न सुझाव दिनुभयो । लुम्बिनीमा शाक्यमुनी बुद्ध, कपिलबस्तुमा कक्रुछन्द र कनकमणि बुद्धको जन्म भएकाले ती क्षेत्र र बृहत्तर लुम्बिनीलाई पनि समेटेर छायाँकन गर्दा अझ प्रभावकारी हुने उहांले बताउनुभयो ।
छलफलमा चलचित्रका निर्माता चाउ डिफिङले आफूहरु अहिले प्रारम्भिक जानकारी लिन मात्रै आएको बताउँदै चिनियाँ दुतावास हुँदै लुम्बिनीमा छायाँकनका लागि आउने बताउनुभयो । उहांले आफूहरुले बुद्धको जीवनको सन्देशलाई चलचित्रमा उतार्न खोजेको बताउँदै त्यसैका लागि यहाँ आएर छायांकन गर्ने योजना रहेको जानकारी गराउनुभयो । निर्माता चाउसँगै छायांकार डेङ्ग छुङमिन सहितको टिम लुम्बिनी आएको हो ।
उनीहरुले चिनबाट चलचित्र छायांँकन गरी लुम्बिनीमा सकाउने योजना रहेको चिनियाँ कलाकारहरुको टोलीका सहजकर्ता डा. सागर न्यौपानेले बताउनुभयो । चिनियाँ कलाकारहरु यहाँ आएर चलचित्र बनाउँदा लुम्बिनीको प्रवद्र्वनमा टेवा पुग्ने उहांको विश्वास छ ।