बुटवल । बुटवलमा जारी दोस्रो मेयर कप अन्तर विद्यालय छात्र÷छात्रा फुटबल प्रतियोगिता अन्तर्गत तेस्रो दिन बुधबार पाँच खेल सम्पन्न भएका छन् । बुटवलको तामनगरस्थित चारपाला खेल मैदानमा जारी छात्रहरुको प्रतियोगितामा बुधबार नविन औद्योगिक कदरबहादुर रिता मावि विजयी भएको छ ।
नविनले नवरत्न माविलाई ४–१ गोल अन्तरले पराजित गरेको हो । यसैगरी सरस्वती मावि र त्रिभुवन युनाइटेड स्कूल बीचको अर्को खेलमा सरस्वती मावि ३–० ले विजयी भएको नगर खेलकुद विकास समितिका सदस्य शेरजङ गुरूङले जानकारी दिनुभयो ।
यसैगरी बुटवलको जवई खेलमैदानमा जारी छात्रहरुको खेलमा नयाँगाउँ मावि विजयी भएको छ । सरस्वती आधारभूत विद्यालयलाई नयाँगाउँ माविले ३–० गोल अन्तरले पराजित गरेको हो । अर्को खेलमा मोतिपुर मावि विजयी भएको छ । उसले ज्ञानोदय माविलाई ४–० गोल अन्तरले पराजित गरेको हो । त्यस्तै जवई खेलमैदानमै भएको अर्को खेलमा न्यू होराइजन माविले प्रगती माविलाई २–० गोल अन्तरले पराजित गरेको छ ।
प्रतियोगिता अन्तर्गत बिहीबार चारपाला खेल मैदानमा नविन औद्योगिक मावि र सरस्वती मावि तथा कान्ति मावि र स्कलर्स होमबीच प्रतिस्पर्धा हुने प्रतियोगिताका खेल कमिसार हरिप्रसाद श्रेष्ठले जानकारी दिनुभयो ।
त्यस्तै जवई खेलमैदानमा छात्र तर्फ नयाँगाउँ मावि र न्यू होराइजन तथा मोतिपुर मावि र अक्सफोर्ड मावि बीच प्रतिस्पर्धा हुने छ । सोही मैदानमा छात्रा तर्फ न्यू होराइजन मावि र अक्सफोर्ड मावि तथा कान्ति मावि र गार्गी माविबीच प्रतिस्पर्धा हुने छ ।
प्रतियोगिताको छात्रतर्फको उपाधि विजेतालाई नगद १ लाख रुपैयाँ तथा उपविजेता टिमलाई नगद ६० हजार रुपैयाँ, कप, मेडल र प्रमाण–पत्रबाट पुरस्कृत गरिने नगर खेलकुद विकास समिति अध्यक्ष बोनिन पियाले बताउनुभयो । यसैगरि छात्रातर्फ उपाधि विजेतालाई नगद ५० हजार रुपैयाँ तथा उपविजेता टिमलाई ३० हजार रुपैयाँ, कप, मेडल र प्रमाण–पत्रबाट पुरस्कृत गरिने उहांले बताउनुभयो ।
यसैगरि प्रतियोगितामा विधागत उत्कृष्ट खेल प्रदर्शन गर्ने खेलाडीहरुलाई समेत पुरस्कृत गरिने छ । प्रतियोगितामा छात्रतर्फ २५ र छात्रातर्फ १० विद्यालयहरुले भाग लिएका छन् । सात दिनसम्म संचालन हुने प्रतियोगितामा १८ लाख खर्च हुने अनुमान रहेको छ । पहिलो संस्करणमा अक्सफोर्ड मावि बुटवल प्रतियोगिताको विजेता रहेको थियो ।
