बुटवल । सञ्चारकर्मी द्वय सुमन श्रेष्ठ र विकास गौतमद्वारा लिखित ‘उद्घोषण पाठशाला’को लोकार्पण भएको छ । बुटवलमा बसेर लामो समयदेखि सञ्चारकर्मसँगै उद्घोषण गर्दै आएका श्रेष्ठ र गौतमको सो पुस्तक आइतबार एक कार्यक्रमका विच लोकार्पण गरिएको हो ।
लोर्कापण कार्यक्रममा बोल्दै अधिवक्ता तथा लेखक युवराज कडेँलले पुस्तक पठन योग्य रहेको बताउँदै कुनै पनि कुरालाई उचित ढङ्गले बोल्न सकिएन भने जस्तोसुकै महत्वपूर्ण कुरा पनि प्रभावविहीन हुने बताउनुभयो । अग्रज पत्रकार खिमानन्द भट्टराईले पुस्तकमा धेरै कुरा समेटिएको र त्यसलाई पढेर लागु गर्न सके धेरै कुरा सिक्न सकिने बताउनुभयो ।
नेपाल पत्रकार महासंघ रुपन्देहीका उपाध्यक्ष विश्वास ढकालले पुस्तकमा भएका कुरा पढेर मानिसमा बोल्ने कलाको विकास गर्न सहयोग पुग्ने खालको रहेको बताउनुभयो । साथै उहांले पुस्तक लेख्नलाई आगमी दिनमा पनि निरन्तरता दिन आग्रह गर्नुभयो ।
पुस्तक लोर्कापण कार्यक्रममा बोल्दै पुस्तकका लेखक सुमन श्रेष्ठले आफूले लामो समयसम्म सञ्चारकर्ममा रहँदा र उद्घोषण गर्दाका अनुभवलाई पुस्तकमा समेटिएको बताउनुभयो । आफुले जानेका कुराहरु अरुलाई पनि बाँडनु पर्छ भनेर पुस्तक लेखेको श्रेष्ठले बताउनुभयो ।
यस्तै अर्का लेखक विकास गौतमले २०६५ देखि आफुहरुले सँगै काम गरेको बताउँदै काम गर्दाका अनुभवहरुका आधारमा पुस्तक लेखेको बताउनुभयो । साथै उहांले अब आफु सञ्चारकर्ममा केही समय सक्रिय नहुने भएपनि सञ्चार क्षेत्रप्रतिको माया र सद्भाव भने रहिरहने उल्लेख गर्नुभयो ।
कार्यक्रममा लेखक सुमन श्रेष्ठका बुबा सत्य रश्मि श्रेष्ठ र विकास गौतमका ससुरा बुबा देविराम पाण्डेले पनि पुस्तकका विषयमा चर्चा गर्नुभएको थियो ।
उद्घोषण पाठशालाका लेखक श्रेष्ठ २०६० सालदेखि सञ्चारकर्ममा सक्रिय रहँदै आउनुभएको छ । श्रेष्ठले यो विचमा बुटवलका विभिन्न रेडियोमा काम गर्नुका साथै विभिन्न कार्यक्रमहरुको उद्घोषण तथा प्रशिक्षण समेत दिदैँ आउनुभएको छ ।
यस्तै २०६६ सालदेखि संचारकर्म सुरु गरेका विकास गौतमसंग पनि विभिन्न संचारमाध्यमा काम गरेको अनुभव छ ।
