बुटवल । रूपन्देही व्यपार संघले साता व्यापी कार्यक्रम गरेर रजत महोत्सव मनाउदै छ । बुधवार पत्रकार सम्मेलन गरेर संघले रजत महोत्सव कार्यक्रमका बारेमा जानकारी गराएको हो ।
पत्रकार सम्मेलनमा बोल्दै संस्था अध्यक्ष दिपकप्रसाद अधिकारीले रजतमहोत्सवका अवसरमा कार्तिक २२ गते मानव सेवा आश्रम भलवारी र सुख्खानगरमा गरी २ सय जनालाई खाद्यान्न तथा लत्ताकपडा वितरण, २३ गते रूपन्देही जिल्ला व्यापारको ईतिहास, वर्तमान र भावी चुनौती विषयामा जिल्ला स्तरिय अन्तर माध्यमिक विद्यालय वक्तृत्वकला प्रतियोगिता, २४ गते संघ संस्था स्तरिय मैत्रीपूर्ण फुटसल प्रतियोगिता, २५ गते संघका वस्तुगत उपसमितिहरूबीच मैत्रीपूर्ण ब्याडमिन्टन प्रतियोगिता, २६ गते वृहत रक्तदान, २७ गते लुम्बिनी प्रादेशिक अस्पतालमा फलफुल वितरण, प्रभातफेरी र रूपन्देहीमा स्थानीय प्रदेश तथा संघिय सरकारका योजना, लक्ष्य तथा यसले पार्ने प्रभाव विषयक गोष्ठीको आयोजना गरेको जानकारी दिनुभयो ।
उहाका अनुसार कार्तिक २८ गते विभिन्न कार्यक्रमसँगै मुल समारोहको आयोजना गरिएको छ । संघले रजत महोत्सव कै अवसरमा कार्तिक ३ गते सालझण्डी र कार्तिक १० गते सेमलारमा निःशुल्क स्वास्थ्य सिविर सगै १५ लाख भन्दा बढिको निःशुल्क औषधी वितरण गरेको अध्यक्ष अधिकारीले जानकारी दिनुभयो । कार्यक्रममा रजत महोत्सव समारोहका संयोजक प्रकाशराज पौडेलले संस्थाले व्यवसायीकसँगै सामाजिक कार्य गर्दै आईरहेको रजत महोत्सवमा पनि सामाजिक कार्यक्रमहरू धेरै रहेको बताउनुभयो । कार्यक्रममा महासचिव फर्सुराम पन्तले पनि कार्यक्रमका बिषयमा जानकारी गराउनु भएको थियो ।
