बाढी पहिरोबाट मृत्यु हुनेको संख्या २४६ पुग्यो

काठमाडौँ । बाढी पहिरोबाट मृत्यु हुनेको संख्या २४६ पुगेको छ । यही असोज ११ र १२ गते परेको अविरल वर्षाका कारण देशका विभिन्न स्थानमा आएको बाढी, पहिरोलगायतका विपदमा परी सोमबार दिउँसोसम्म २४६ जनाको मृत्यु भएको प्रहरी प्रधान कार्यालयले जनाएको छ ।
प्रहरी प्रधान कार्यालयका अनुसार बाढी, पहिरो लगायतका विपदमा परी काठमाडौं उपत्यकामा ७० जना, कोशी प्रदेशमा २० जना, मधेश प्रदेशमा ९ जना, बागमती प्रदेशमा १३९ जना, लुम्बिनी प्रदेशमा २ जना गरी जम्मा २४६ जनाको मृत्यु भएको छ ।
यस्तै, काठमाडौं उपत्यकामा ३७ जना, कोशी प्रदेशमा १४ जना, मधेश प्रदेशमा ९ जना, बागमती प्रदेशमा ११५ जना गरी जम्मा १७८ जना घाइते भएका छन् । प्रहरीका अनुसार घाइतेहरूको स्थानीय अस्पतालमा उपचार भइरहेको छ ।
बाढी पहिरोमा परी १८ जना अझै बेपत्ता भएका र बेपत्ता भएकाहरुको खोजी कार्य जारी रहेको प्रहरीले जनाएको छ । प्रहरीका अनुसार विपदमा परेका १७ हजार १७४ जनाको उद्धार गरिएको छ ।