सडकको दुरावस्थाका कारण यात्रुले सहजरूपमा सेवा प्राप्त गर्न नपाएको यातायात ब्यवसायीको गुनासो

बुटवल । महंगा र सुविधा सम्पन्न गाडीहरू भए पनि सडकको दुरावस्थाका कारण यात्रुले सहजरूपमा सेवा प्राप्त गर्न नपाएको यातायात ब्यवसायीहरुले गुनासो गरेका छन् । उनीहरुले सडकको दुरावस्थाकै कारण यात्रुहरुलाई सहज र सुरक्षित यात्राको ब्यवस्थापन थप चुनौतीपुर्ण बन्दै गएको बताए ।
बुटवलस्थित पश्चिम नेपाल बस ब्यवसायी प्रा.लि.ले विजयादशमी, शुभ दिपावली, छठ लगायतका पर्वको अवसरमा आइतबार आयोजना गरेको शुभकामना आदानप्रदान तथा सम्मान कार्यक्रममा बोल्ने यातायात ब्यवसायीहरुले आफुहरूसँग नेपालमै महंगा र सुविधा सम्पन्न गाडीहरू भए पनि सडकको दुरावस्थाका कारण यात्रुले सहजरूपमा सेवा प्राप्त गर्न नपाएको गुनासो गरेका हुन् ।
कार्यक्रममा बुटवल उपमहानगरपालिकाका नगरप्रमुख खेलराज पाण्डेले स्थानीय सरकार नगरबासीहरुको सुविधा र सेवालाई प्राथमिकतामा राखेर काम गर्दै आएको दाबी गर्नुभयो । उहांले चाडपर्वमा हुने गरेका आपराधिक घटना र ठगी रोक्ने गरी विभिन्न सरोकारवाला निकायहरुसंग समन्वय गरेर काम गरिरहेको बताउनुभयो । धेरै यात्रुहरुको चाप हुने बसपार्कको सुरक्षा गतिविधिलाई सिसिटिभि क्यामराबाट निरिक्षण, सरसफाई, शौचालय ब्यवस्थापन लगायतको काम भएको भन्दै यसका लागि सबै नगरबासीको साथ र सहयोग जरुरी रहेको बताउनुभयो ।
पश्चिम नेपाल बस ब्यवसायी प्रा.लि.का अध्यक्ष दधिराम खरेलले आम ब्यवसायीहरुको हकहितसंगै उपभोक्ताहरुको अधिकार र सुविधाको विषयमा संस्था सधै गम्भिर रहेको बताउनुभयो । उहांले आफुहरूसँग सुविधासम्पन्न र नेपालमै महंगा सवारी साधनहरू रहेको बताउंदै सडकको दुरावस्थाको कारण यात्रुले सहजरूपमा यात्रा गर्न नपाएको गुनासो गर्नुभयो । उपभोक्तालाई सेवा दिने भनेर ल्याइएको ईभिको नाममा देखिएको दलाली रोक्न समेत उहांले आग्रह गर्नुभयो ।
कार्यक्रममा ईलाका प्रहरी कार्यालय बुटवलका प्रमुख प्रहरी नायब उपरिक्षक विजयराज पण्डितले शान्तिसुरक्षाको विषयलाई गलत भाष्य बनाउन नहुने बताउनुभयो । चाडपर्व नजिकिएसंगै आम जनसमुदायको सुरक्षा सहजताको विषयमा प्रहरीले विशेष योजनाका साथ काम गरिरहेको भन्दै सवारी साधनमा यात्रुसंग बढि भाडा लिने, क्षमताभन्दा बढि सवारी चढाउने जस्ता गुनासोप्रति विशेष चासो दिएर यस्ता गतिविधिलाई रोक्नेतर्फ प्रहरी लागेको उहांले बताउनुभयो ।
बुटवल उद्योग वाणिज्य संघका अध्यक्ष हरि अर्यालले सबै ब्यवसायलाई मर्यादित र ब्यवस्थित रुपमा सञ्चालन गर्ने तर्फ सबै सचेत हुनुपर्नेमा जोड दिनुभयो ।
नेपाल पत्रकार महासंघ रुपन्देहीका अध्यक्ष रामराज पोखरेलले यात्रुलाई सुरक्षित रुपमा गन्तब्यमा पुराउने प्रमुख जिम्मेवारी यातायात ब्यवसायीको भएको बताउनुभयो ।
कार्यक्रममा प्रा.लि.का वरिष्ठ उपाध्यक्ष नारायण घिमिरेले यात्रुहरुलाई सुरक्षित यात्रा गराउने अभियानमा आफुहरू लागेको भन्दै सरोकारवाला निकायहरुसंग समन्वय गरेर सहज र सुरक्षित यात्राको ब्यवस्था मिलाइएको दाबी गर्नुभयो ।
कार्यक्रमकै अवसरमा प्रा.लि.ले बुटवल अटो ईन्जिनियरिङ एशोसियसनका नव निर्वाचित अध्यक्ष प्रेम गौचनसहित पदाधिकारी तथा सदस्यहरुलाई सम्मान गरिएको छ । यस्तै विकास बहुउदेश्यीय सहकारी संस्था लिमिटेडमा निर्वाचित पदाधिकारीहरुलाई समेत सोही कार्यक्रममा सम्मान गरिएको प्रा.लि.का कोषाध्यक्ष मोहन पिएसले जानकारी दिनुभयो ।
सोहीे अवसरमा दुर्घटनामा ज्यान गुमाएका प्रा.लि.का सहचालक एवं पश्चिम नेपाल बहुउदेश्यीय सहकारी संस्थाका शेयर सदस्य सन्तोष बिकको परिवारलाई बिमा वापतको रकम हस्तान्तरण गरिएको थियो । स्वर्गीय विकका परिवारका सदस्य श्रीमती बिबिता श्रीष र छोरा कुशल सुनार (नाबालक) लाई १५ लाख रुपैयाँ रकम हस्तान्तरण गरिएको हो ।