बुटवल । चार्डपर्व नजिकिएसँगै बुटवल उपमहानरपालिकाले मासुजन्य पसलको अनुगमनलाई तीब्र बनाएको छ । उपमहानगरपालिकाले वधशालाको स्वच्छकर मात्रै मासु विक्रीको लागि पटक पटक आग्रह गर्दा समेत अटेरी गर्ने ३ वटा मासु पसललाई दोस्रो पटक थप २५ हजार जरिवाना गरेको हो ।
बुटवल उपमहानगरपालिकाका नायव सुब्बा अनिल कुमार माण्डव्यका अनुसार आज (मंगलबार) न्यू अर्घाखाँची भुसाल मिट सप बुटवल ७, बुटवल मिट सप्लायर्स बुटवल ९ र ज्योति माइला मासु पसल बुटवल ९ लाई थप २५ हजार जरिवाना गरिएको हो । बुटवल उमपहानगरपालिकाले ती मासु पसलहरुलाई यस अघि १० हजार जरिवाना गरेको थियो ।
पहिलो पटक जरिवाना गरिए पनि उनीहरुले बधशालाको मासु विक्री नगरी बाहिर नै बध गरेको खसी बोकाको मासु विक्री गरेको पाइएकाले ती पसलहरुलाई पुन थप २५ हजार जरिवाना गरिएको उपमहानगरका नायव सुब्बा माण्डबयले बताउनुभयो ।
उपमहानगरले अको पटक अनुगमन गर्दा पनि बाहिर बध गरेको मासु बिक्री गरेको पाइए उनीहरुलाई तेस्रो पटक ५० हजार जरिवाना हुने र त्यसपछि पनि बधशालाको मासु विक्री नगरी बाहिरको मासु विक्री गरिएको पाइए चौथो पटकमा पसल नै बन्द गरिने नायव सुब्बा माण्डव्यले बताउनुभयो । बुटवलवासीको स्वास्थ्यप्रति बुटवल उपमहानगरपालिका विशेष संवेदनशील रहेको भन्दै सुब्बा माण्डब्यले अनिवार्य रुपमा वधशालामा बध गरिएको स्वच्छ खसी बोकाको मासु मात्र विक्री वितरण गर्न र बधशालामा वध गरिएको मासु मात्रै उपभोग गर्न आग्रह गर्नुभयो ।
नगरपालिकाले लामो समय देखि मासुजन्य बस्तु (खसीबोका) बधशालामा मात्रै बध गरेको विक्रि वितरण गर्नुपर्ने निमय लागू समेत गरिसकेको छ । तर, मासु व्यवसायीहरुले विभिन्न बाहाना देखाएर बधशालामा बध गरिएको मासु विक्री गर्न आलटाल गरिरहेका छन् । दशै नजिकएकाले दशैको अघिल्लो दिनसम्म नै बजारको अनुगमन गर्ने उपमहानगरपालिकाको तयारी रहेको छ ।
