बुटवल । लुम्बिनी प्रदेशका वन तथा वातावरण मन्त्री बादशाह कुर्मीले मन्त्री पदबाट राजीनामा दिनुभएको छ ।
बाँकेकी एकल महिला निर्मला कुर्मीलाई अपहरण र बेपत्ता पार्ने कार्यमा संलग्न भएको आरोप लागेका मन्त्री कुर्मीलाई बर्खास्त गर्न माग गर्दै महिला अधिकार मञ्च बाँके सहित विभिन्न संघ–संस्थाले एक महिनादेखि काठमाडौंमा आन्दोलन गर्दै आएका थिए ।
कुर्मी गएको साउन ९ गते लुमिबनी प्रदेश सरकारको मन्त्री नियुक्त हुनुभएको थियो । कर्मीको नियुक्तिले कांग्रेसभित्रको संस्थापन इतर पक्ष समेत असन्तुष्ट थियो । कांग्रेसका सहमहामन्त्री किशोरसिंह राठौर निकट मानिने कुर्मीलाई कांग्रेस संसदीय दलका नेता डिल्लीबहादुर चौधरीले मन्त्रीका लागि सिफारिस गर्नुभएको थियो ।
नेपाली कांग्रेस लुम्बिनी प्रदेश समितिले समेत सभापति शेरबहादुर देउवालाई ध्यानाकर्षण पत्र दिएर विबादित छवी भएका कुर्मीलाई मन्त्री बनाउने निर्णयमा पुनर्विचार गर्न आग्रह गरेको थियो ।
चौतफीृ दवाव र आलोचना बढेपछि लुम्बिनी प्रदेशका मुख्यमन्त्री आचार्यले मन्त्री कुर्मीलाई राजीनामा दिन उपयुक्त हुने सन्देश दिएको बताइएको छ । स्रोतका अनुसार मंगलबार मुख्यमन्त्री आचार्य र कांग्रेस संसदीय दलका नेता डिल्लीबहादुर चौधरीबीच कुर्मीको राजीनामाबारे छलफल भएपछि चौधरीले पनि राजीनामा दिन उपयुक्त हुने सुझाव दिनुभएको थियो ।
मुख्यमन्त्रीका प्रेस संयोजक दशरथ घिमिरेले मन्त्री कुर्मीले मुख्यमन्त्री समक्ष राजीनामा बुझाएको पुष्टि गर्नुभयो । कुर्मीलाई मन्त्रिपरिषदमा राखेपछि मुख्यमन्त्री आचार्य र सरकारको समेत आलोचना भइरहेको थियो ।
