रूपन्देही देवदहका कृष्ण थारु रोहिणी नदीमा हाम फालेर वेपत्ता

बुटवल । रूपन्देहीको देवदह नगरपालिका अन्तर्गत रोहिणी नदीमा हाम फालेर एक जना वेपत्ता भएका छन् । बेपत्ता हुनेमा देवदह नगरपालिका वडा नं–३ टटेराका २८ वर्षीय कृष्ण थारू रहेका प्रहरीले जनाएको छ ।

थारू शुक्रबार बिहान रोहिणी नदीमा हामफालेर वेपत्ता भएका प्रहरी चौकी खैरेनीले जनाएको छ । नदीमा बेपत्ता भएका थारूको खोजि भइरहेको प्रहरीले जनाएको छ ।

गएराती परेको भारी बर्षाको कारण रोहिणी नदीको बहाव बढेसंगै बस्ती डुबानमा परेपछि प्रहरीले केही परिवारलाई उद्धार गरेको थियो । बर्षात संगै नदीमा आएको बाढीका कारण डुबानमा परेको स्थानीय टंक बहादुर थापाको बंगुर फर्म नजिकै बस्ने सिकन्दर थारुको परिवारलाई शुक्रबार बिहान ५ः३० बजे प्रहरीले उद्धार गरेको भए पनि सिकन्दरका छोरा कृष्ण थारू बिहान ९ बजेको समयमा नदीमा हाम फालेको देवदह प्रहरी चौकीका इञ्चार्ज एक्कबहादुर नेपालीले जानकारी दिनुभयो ।

बिहीबार राती परेको वर्षा संगै रोहिणी नदीमा आएको बाढीका कारण डुबानमा परेका देवदह नगरपालिका वडा न.८ का बुद्धिराम नेपाली, भरत नेपाली र कमला नेपाली समेतलाई प्रहरीले शुक्रबार बिहान ४ः ३० बजे उद्धार गरेको थियो ।