बुटवल । सडकमा रहेका छाडा चौपायाले कुल्चीदा बुटवलमा एक महिलाको ज्यान गएको छ । गुल्मीको रेसुङ्गा नगरपालिका–४ अर्खले भई हाल बुटवल गोलपार्क बस्दै आएकी ४५ वर्षीया सीता पाण्डेको सडकमा रहेका साँढे (छाडा चौपाया)ले कुल्चीदा ज्यान गएको ईलाका प्रहरी कार्यालय बुटवलका प्रमुख प्रहरी नायव उपरीक्षक विजयराज पण्डितले जानकारी दिनुभयो ।
यही साउन २० गते सडकमा जुधिरहेका २ वटा साँढेले बाटो हिँडिरहेकी सीतालाई कुल्चीएका थिए । साँढेले कुल्चीए पछि गम्भीर घाइते भएकी पाण्डेलाई उपचारका लागि बुटवलको लुम्बिनी प्रादेशिक अस्पतालमा ल्याइएको थियो । उपचारकै क्रममा साउन २४ गते पाण्डेको मृत्यु भएको प्रहरीले जनाएको छ । सीता बुटवल गोलपार्कमा सामान्य चिया पसल सञ्चालन गर्दै आएकी थिइन् । साउन २५ गते मृतकको शव पोष्टमार्टम पश्चात निजको छोरा अंकुश पाण्डेले शव बुझेको प्रहरीले जनाएको छ ।
बुटवलको सडकमा रहेका छाडा चौपायाका कारण ट्राफिक व्यवस्थापनमा समेत समस्या हुने गरेको छ ।
