बुटवल । प्रदेशका सरकारले शनिवार आर्थिक बर्ष २०८१÷०८२ को लागि वजेट सार्वजनिक गरेका छन् । प्रदेश सरकारले हरेक वर्ष असार १ गते बजेट सार्वजनिक गर्नुपर्ने संबैधानिक व्यवस्था अनुसार बजेट सार्वजनिक गरेका हुन् ।
अन्य प्रदेश सरकारले जस्तै लुम्बिनी प्रदेश सरकारले पनि आर्थिक बर्ष २०८१\०८२ को लागि ३८ अर्व ९७ करोड ९५ लाख ३६ हजार बराबरको बजेट सार्वजनिक गरेको छ ।
प्रदेश सभा बैठकमा आर्थिक मामिला तथा योजना मन्त्री चेतनारायण आचार्यले आगामी आर्थिक वर्षका लागि राजश्व र व्ययको वार्षिक अनुमानित बजेट पेश गर्नु भएको हो ।
मन्त्री आचार्यका अनुसार चालुतर्फ ११ अर्व २४ करोड २७ लाख ८४ हजार अर्थात २८ प्रतिशत रकम बिनियोजन गरिएको छ भने पुँजीगत तर्फ २४ अर्व ५८ करोड ५९ लाख अर्थात ६६ प्रतिशत बराबरको बजेट बिनियोजन गरिएको छ । यस्तै बित्तिय हस्तान्तरणतर्फ ३ अर्व १४ करो १३ लाख १६ हजार अर्थात ८ दशमलव ०६ प्रतिशत रकम बिनियोजन गरिएको मन्त्री आचार्यले प्रस्तुत गरेको बजेट बक्तब्यमा उल्लेख छ ।
आगामी आर्थिक वर्षको बजेट चालू आर्थिक वर्षको भन्दा १ अर्ब ५१ करोड रूपैयाँले कम हो । चालू आर्थिक वर्षको लागि प्रदेश सरकारले ४० अर्ब ४७ करोड ९७ लाख रुपैयाँ बराबरको बजेट ल्याएको थियो । प्रदेश सञ्चित कोषमाथि व्ययभार हुने रकमतर्फ १ करोड ४ लाख ६४ हजार विनियोजन गरिएको छ । बजेटमा कृषि, पर्यटन र रोजगारीलाई प्राथमिकतामा राखिएको प्रदेश सरकारले दावी गरेको छ ।
आगामी आर्थिक वर्षमा अनुमान गरिएको खर्च व्यहोर्ने स्रोत मध्ये आन्तरिक राजस्वबाट ७ अर्ब ५१ करोड २१ लाख, संघबाट प्राप्त हुने राजस्व बाँडफाँटबाट १२ अर्ब १ करोड ५० लाख, संघबाट प्राप्त हुने रोयल्टी ५० करोड १७ लाख, स्थानीय तहबाट बाँडफाँट भई प्राप्त हुने राजस्व २ अर्ब ९२ करोड १९ लाख हुने अनुमान गरिएको छ ।
यस्तै गरी संघीय सरकारबाट प्राप्त हुने वित्तीय समानीकरण अनुदानबाट ८ अर्ब २८ करोड ६४ लाख, सशर्त अनुदानबाट ४ अर्ब १९ करोड ३३ लाख, समपूरक अनुदानबाट७९ करोड ५० लाख, विशेष अनुदानबाट ७४ करोड ४६ लाख, चालु आर्थिक वर्षको नगद मौज्दातबाट २ अर्ब परिचालन हुने अनुमान गरिएको छ । २
यस्तै गण्डकी प्रदेश सरकारले आर्थिक बर्ष २०८१\०८२ को लागि ३२ अर्ब ९६ करोड ८५ लाख बजेट ल्याएको छ । आर्थिक मामिला मन्त्री टकराज गुरूङले शनिबार प्रदेशसभामा बजेट प्रस्तुत गर्दै चालुतर्फ १३ अर्ब १६ करोड अर्थात ३९ प्रतिशत र पुँजीगततर्फ ६० प्रतिशत अर्थात १९ अर्ब ५१ करोड बजेट विनियोजन गर्नुभएको हो । बजेटको यो आकार चालु आर्थिक वर्षको भन्दा ८५ करोडले कम हो ।
त्यस्तै कोशी प्रदेश सरकारले आगामी आर्थिक वर्ष २०८१\८२ का लागि ३५ अर्ब २७ करोडको बजेट ल्याएको छ । आर्थिक मामिला तथा योजना मन्त्री रामबहादुर मगरले चालु आर्थिक वर्षको भन्दा एक अर्ब कमको बजेट प्रदेशसभा बैठकमा प्रस्तुत गर्नु भएको हो । चालू आर्थिक वर्षका लागि कोशी सरकारले ३६ अर्ब ७४ करोडको बजेट ल्याएको थियो । प्रदेश सरकारले आगामी वर्षका लागि चालुतर्फ १४ अर्ब ४७ करोड ३० लाख र पुँजीगत तर्फ १६ अर्ब २० करोड र वित्तीय व्यवस्थातर्फ ४ अर्ब ५८ करोडको बजेट विनियोजन गरेको छ ।
त्यस्तै कर्णाली सरकारले आगामी आर्थिक वर्ष २०८१\०८२ का लागि ३१ अर्ब ४१ करोड ४१ हजार रुपैयाँ कुल बजेट ल्याएको छ । प्रदेश सभामा आर्थिक मामिला तथा योजना मन्त्री महेन्द्र केसीले बजेट प्रस्तुत गर्नु भएको हो् । प्रदेश सरकारले सार्वजनिक गरेको बजेटमा पूँजीगततर्फ १८ अर्ब ७५ करोड ८ लाख ६८ हजार रुपैयाँ विनियोजन गरिएको छ । यो कुल बजेटको ५९दशमलव ७ प्रतिशत हो । यस्तै चालुतर्फ ७ अर्ब ५७ करोड ५५ लाख ९२ हजार रहेको छ । यो कुल बजेटको अर्थात २४दशमलव १२ प्रतिशत प्रतिशत हो । सरकारले ल्याएको बजेट चालु आर्थिक वर्षको भन्दा २ अर्ब घटेर आएको छ । त्यस्तै सुदूरपश्चिम प्रदेश सरकारले अगामी आर्थिक वर्ष २०८१\८२ का लागि ३१ अर्ब ६२ करोड ९८ लाख २८ हजार बराबरको वार्षिक बजेट ल्याएको छ् । प्रदेशका आर्थिक मामिला मन्त्री सुरेन्द्रबहादुर पालले प्रदेश सभाको बैठकमा अगामी आर्थिक वर्षका लागि ३१ अर्ब ६२ करोड ९८ लाख २८ हजार बराबरको वार्षिक बजेट प्रस्तुत गर्नु भएको हो ।
