बुटवल । क्लोथ एण्ड फूड बैंक नेपालले रुपन्देहीको बुटवल उपमहानगरपालिकामा क्लोथ बैंक सञ्चालनमा ल्याएको छ । केही दिन अघि मात्र बुटवल उपमहानगरपालिका रुपन्देही र क्लोथ एण्ड फूड बैंक नेपाल बीच क्लोथ बैंक सञ्चालन गर्ने संझौता भए अनुसार शनिबार औपचारिक रुपमा बुटवलमा क्लोथ बैंक सञ्चालनमा आएको हो ।
महानायक राजेश हमालको उपस्थितिमा क्लोथ एण्ड फूड बैंकको शुभारम्भ गरिएको हो ।
शुभारम्भ कार्यक्रममा बोल्दै बुटवल उपमहानगरपालिकाका नगरप्रमुख खेलराज पाण्डेयले क्लोथ बैंकमा जम्मा हुने कपडाले दुःखी र विपन्न बर्गहरुलाई न्यानो प्रदान गर्न सकिने बताउनु भयो । उहांले बुटवल उपमहानगरपालिका सवै नागरिकहरु प्रति सचेत भएको बताउंदै क्लोथ बैंक सञ्चालन पछि विपन्न र गरिव बर्गका लागि हित हुने विश्वास व्यक्त गर्नुभयो ।
कार्यक्रममा महानायक राजेश हमालले समाज परिवर्तनका लागि युवा समूहरुले गरेको सामाजिक कार्यको प्रशंसा गर्दै उक्त कार्यमा आफू संलग्न हुन पाउँदा खुशी लागेको बताउनुभयो । कुनै पनि व्यक्तिका लागि आवश्यक नभएको कपडा अरुलाई आवश्यक पर्ने भन्दै क्लोथ बैंकमा आफुलाई आवश्यक नपर्ने कपडा जम्मा गरिदिन सवैलाई आग्रह समेत गर्नुभयो ।
मानव सेवाको लागि पुरानो कपडालाइ पुन प्रयोग भन्ने मुल नाराका साथ सुरु भएको क्लोथ बैंक बुटवलका विभिन्न स्थानमा संकलनका लागि बक्स राखिने र संकलित कपडालाई पुनः प्रशोधन गरेर आवश्यकताका आधारमा वितरण गरिने क्लोथ एण्ड फूड बैंक नेपालका अध्यक्ष कमल जि.सी.ले बताउनु भयो । उहांले आगामी दुई वर्षमा कपडा विहीन मुक्त बनाउने र २०८२ सम्ममा देशभर फूड एम्बुलेन्स समेत सञ्चालन गर्ने योजना बनाएको उल्लेख गर्नुभयो । उहांका अनुसार अहिलेसम्म १५४ स्थानीय सरकार यो अभियानमा जोडिएका छन् ।
कार्यक्रममा सफल सञ्चारकर्मी एवं वरिष्ठ कलाकार दिनेश डि.सीले परोपकारी कार्य सधै मानव विकासका लागि हुने भन्दै उक्त कार्यक्रमा जोडिन सबै नगरबासीलाई आग्रह गर्नुभयो । क्लोथ बैंकमा आफ्नो घरमा भएका पुरानो कपडा हुनेहरूले दान गर्न सक्ने छन् भने आवश्यक पर्नेहरुले निशुल्क लिन सक्नेछन् । उक्त कार्यक्रमको सञ्चालन सञ्चारकर्मी आविश्कार खनालले गर्नुभएको थियो ।
