बुटवल, २४ बैशाख । नेकपा एमालेका उपाध्यक्ष बिष्णु पौडेलले एमालेले अघि सारेका योजना सम्पन्न गर्न एमालेले नै जित्नुपर्ने बताएका छन् । विरोधीहरुले विकासे आयोजनामा पनि राजनीति गरेर अबरुद्ध गर्न सक्ने आशंका ब्यक्त गर्दै उनले राष्ट्रिय योजनाका काम सम्पन्न हुंदा बुटवल एक नमुना शहर बन्ने दाबी गरे ।
उनले बुटवलमा नेकपा एमालेका उमेदवारहरुको जित सुनिश्चित भैसकेको पनि बताए । ‘चुनाव जितिन्छ भन्ने कुरामा समस्या छैन, तर कुन ढंगले जित हुन्छ भन्ने मात्रै बांकी हो’–उनले भने ।
बुटवलमा शनिवार भएको गठबन्धनको सभालाइ इंगित गर्दै उनले एजेण्डा बिनाको सभाको कुनै अर्थ नरहेको टिप्पणि गरे । प्ुरा गठबन्धन एकातिर र एमाले अर्कोतिर लडाइमा रहेता पनि गठबन्धनले एमालेलाई हराउन नसक्ने बताए ।
नेकपा एमाले बुद्धिजीवी तथा पेशागत निर्वाचन परिचालन कमिटीको आयोजनामा भएको भेलालाई सम्बोधन गर्दै एमाले पोलिटब्युरो सदस्य लिला गिरीले अहिले सम्मको अनुमानमा प्रदेशका धेरै पालिकामा एमालेको जित निश्चित भएको बताए । कार्यक्रममा बुटवल उपमहानगरपालिका प्रमुख र उपप्रमुख पदका उम्मेदवार बाबुराम भट्टराई र सावित्रादेवी अर्यालले पनि बोलेका थिए ।
भेलामा सहभागि एमाले पक्षका बुद्धिजीविहरुले बुटवलको विकास र सम्मृद्धिका लागि नेकपा एमालेका उम्मेदवारहरुलाई मत दिने प्रतिबद्धता जनाएका छन् । बुटवलमा सञ्चालित राष्ट्रिय र अन्तरराष्ट्रिय महत्वका पूर्वाधारहरु एमालेकै नेतृत्वमा अघि बढिरहेकाले ती आयोजनाहरु सम्पन्न गर्नका लागि पनि उपमहानगरपालिकामा एमालेकै नेतृत्व जरुरी रहेको उनीहरुको निष्कर्ष छ ।
बुद्धिजिवी आरसी आचार्यले विगत १० वर्ष यता बुटवल र आसपासमा भइरहेका पूर्वाधार निर्माणले यसलाई मुलुककै नमुना शहरको रुपमा विकास गरिरहेको प्रतिक्रिया दिनुभयो । बुद्धिजिवी तेजप्रसाद कंडेलले नेकपा एमालेले निर्माण गरेका गौरवका संचरनालाई अरु पार्टीहरुले अस्पताल वा अन्य संरचनामा परिणत गर्ने घोषणा गरेर आम नागरिकलाई चिन्तित तुल्याएकाले निर्माण सम्पन्न भएका र निर्माणाधिने संरचनाहरुको सही सदुपयोगका लागि बुटवलमा एमालेको विकल्प खोज्न नहुने बताउनुभयो ।
बुद्धिजिवी बसन्तराज खनालले बुटवलको शिक्षा र स्वास्थ्यको विकासका लागि नेकपा एमालेको योगदानलाई बुद्धिजिवीहरुले विर्सिन नहुने धारणा राख्नुभयो ।
