‘एमालेलाई स्थानीय तहको चुनावमै रोकेर तालिम दिनुपर्छ’
बुटवल, २४ वैशाख । नेपाली कांग्रेसका वरिष्ठ नेता रामचन्द्र पौडेलले एमाले अध्यक्ष केपी ओली राजनीतिक स्थिरता खलबल्याउने नायक भएको आरोप लगाएका छन् ।
एमालेले संसद विघटन गरेर अस्थिरता ल्याएकाले उसलाई स्थानीय तहको चुनावबाटै रोक्नुपर्ने भन्दै नेता पौडेलले भने–‘ओली र उनका अनुयायीलाई स्थानीय, प्रदेश र संघ गरेर तीनै तहका चुनावमा पराजित गर्नुपर्ने छ ।’
ओलीकै कारण संसद, अदालत र संवैधानिक निकायमा अस्थिरता निम्तिएको भन्दै नेता पौडेलले एमालेलाई स्थानीय तहको चुनावमै रोकेर तालिम दिनुपर्ने बताए ।
तत्कालीन राजा महेन्द्र र ज्ञानेन्द्रले जस्तै राष्ट्रवादको नाममा औलीले प्रतिगमन गरेर ठगेको आरोप लगाएंदै नेता पौडेलले भने–‘दिउँसो चुच्चे नक्सा देखाउने राति भारतीय खुफिया एजेन्सीका प्रमुख सामन्त गोयलसँग लम्पसार पर्ने ।’
नेता पौडेलले बुटवलका लागि जनताको घर घरमा पुग्ने, अस्पतालको बेड बेडमा पुग्ने सबैको अगाडि सजिलै उपलब्ध हुने गठबन्धनका उम्मेदवार खेलराज पाण्डे जस्तै मेयर चाहिएको बताए ।
सभामा नेपाली कांग्रेसका प्रवक्ता प्रकाशशरण महतले गफ भन्दा कामका पछि लाग्न आग्रह गर्दै गठबन्धनलाई जिताउनुपर्ने बताए । केन्द्रीय सदस्य बालकृष्ण खाँणले गठबन्धन नै अहिलेको आवश्यकता रहेको बताए ।
नेपाली काँग्रेस रुपन्देहीका सभापति रामकृष्ण खाँणको सभापतित्वमा भएको चुनावी सभामा नेकपा समाजवादी नेतृ रामकुमारी झाँक्री, राष्ट्रिय जनमोर्चाका कार्यकारी अध्यक्ष रेश्मिराज नेपाली, माओवादीका स्थायी कमिटी सदस्य चक्रपाणि खनाल (बलदेब), जनता समाजवादीका नेता नवराज सुवेदी, मेयरका उम्मेदवार खेलराज पाण्डे, उपमेयरका उम्मेदवार चीनबहादुर गुरुङ, माओवादी रुपन्देही प्रमुख निर्मल जिसी, कांग्रेस नेता युवराज गिरीलगायतले आआफ्ना धारणा राखेका थिए ।
