रामकुमार श्रेष्ठ
नवलपरासी, १० साउन । पूर्वी नवलपरासीको कावासोतीमा विहिबारराति एउटा सरकारी गाडीमा आगजनी भएको छ । गाडीमा आगो लाग्नुको कारणबारे प्रहरीले अनुसन्धान गरिरहेको भए पनि आगो विप्लव नेतृतवको माओवादीका कार्यकर्ताहरुले लगाइदिएको हुन सक्ने आशंका गरिएको छ ।
नवलपुर जिल्ला अदालतका श्रेष्तेदार सारदादत्त बडु चढ्ने बा २ झ ३५०२ नम्बरको गोडीमा विहिबारराति आगजनी भएको हो ।
जिल्ला प्रहरी कार्यालय नवलपुरका प्रहरी नायव उपरीक्षक एवम सुचना अधिकारी अर्जुन रानाभाटका अनुसार गाडीको मुनी मट्टितेलको गन्ध आएको र बोराका टुक्रा समेत फेला परेकोले गाडीमा कसैले आगो लगाइदिएको हुन सक्ने अनुमान प्रहरीले गरेको छ ।
कावासोती ८ थकाली चोक निवासी अर्जुनकुमार श्रेष्ठको घरमा भाडामा बस्दै आएका बडु चढ्ने सो गाडी श्रेष्ठको घर साइडमा फार्किङ गरि राखेको थियो ।
राति सोही घरमा भाडामा बस्ने झपटबहादुर कुवर लगायत ४ जना मानिस काठमाडौं जान निस्कँदा एक्कासी आगो बलिरहेको देखेपछि प्रहरीलाई खबर गरेका थिए । राति नै प्रहरी, स्थानीय र दकलको सहायताले आगो नियन्त्रणमा लिइएको थियो ।
आगलागीमा परी गाडीको अघिल्लो भाग र इन्जिन जलेर नष्ट भएको छ । विप्वल समूहले केही दिन अघि सरकारी गाडी चल्न नदिने घोषणा गरेकाले सोही समूहले आगजनी गरेको हुनसक्ने अनुमान गरिएको छ । तर अहिले सम्म यस बिषयमा केही खेलुको छैन ।
