कपिलवस्तु पुनः सिल : जेठ २० सम्म आवत जावत पूर्ण निषेध

कपिलवस्तु, ६ जेठ । जिल्ला प्रशासन कार्यालय कपिलवस्तुले जिल्ला सिल गर्ने निर्णयलाई निरन्तरता दिएको छ । यस अघि बैशाख २९ देखि जेठ ५ गते सम्म जिल्ला सिल गर्ने निर्णयलाई निरन्तरता दिदै प्रशासनले थप १५ दिन जिल्लालाई सील गरेको छ ।
जिल्लामा कोरोना संक्रमितको संख्या बढ्दै गएको र संक्रमण फैलने उच्च जोखिम जेठ २० गते (१५ दिन) सम्म जिल्लालाई पुनः सिल गर्ने निर्णय गरिएको कपिलवस्तुका प्रमुख जिल्ला अधिकारी दीर्घनारायण पौडेलले बताउनु भयो । कपिलवस्तु कोरोनाको रेड जोनमा परेको र सरकारले पनि जेठ २० गतेसम्म लकडाउन लम्ब्याएकाले कोरोनाको थप संक्रमण उच्च जोखिमवाट बच्न सोही अवधि सम्म जिल्ला सिल गर्ने निर्णय गरिएको प्रजिअ पौडेलले वताउनु भयो ।
प्रशासन कार्यालयमा बसेको कोरोना बिपद ब्यवस्थापन समिति र जिल्ला सुरक्षा समितको संयुक्त बैठकले जेठ २० गते मध्यरातसम्म जिल्लालाई सील गर्ने निर्णय गरेको हो । जिल्लामा कोरोना संक्रमितको संख्या बढ्दै गएपछि यसको जोखिम कम गर्न समितिले जिल्लालाई सिल गर्ने अवधि थपेको हो । जिल्ला सिल गरिए संगै जिल्लाका मानिस बाहिर जान र बाहिरी मानिस जिल्ला आउन निषेध गरिएको छ ।
जिल्ला सिलका बेला यसअघि गरिएका निर्णय यथावत छन् भने तरकारी र खाद्यान्न किन्ने दिन घटाईएको छ । हप्ताको ३ दिन सोमवार, बुधवार र शनिवार बिहान ७ देखि नौ बजे मात्र सामाजिक दुरी कायम गरेर तरकारी र खाद्यान्न खरिद विक्री गर्ने समय निर्धारण गरिएको छ ।
राजमार्गमा अत्यावश्यक सामाग्री बोकेका सवारी साधन बाहेका सवारी चल्न पाउने छैनन् भने जिल्ला भित्रका सबै उद्योग धन्दा, कलकारखाना, ब्यवसाय, र सवारी साधन संचालनमा पूर्ण रोक लगाईएको छ । स्थानीय प्रशासन ऐन २०२८ को दफा (६) ९३० क र संक्रमण रोग ऐन २०२० को दफा २ (१) अनुसार जिल्ला सिल गरिएको हो । जिल्ला सिल गरिए संगै अव सवारी पासमा समेत कडाई गरिने जिल्ला प्रशासन कार्यालयले जनाएको छ ।