भैरहवा, १ जेठ । नोभल कोरोना भाइरस पोजिटिभ देखिएका विरामीको उपचार शुरु गरेको भैरहवाको भीम अस्पताललाई युवा व्यवसायी सुनिल रायमाझीले स्वास्थ्य सामग्री सहयोग गर्नुभएको छ ।
होटल निर्वाणाका अध्यक्ष समेत रहेका रायमाझीले अस्पतालमा कार्यरत स्वास्थ्यकर्मीको प्रयोजनार्थ ५ थान पिपीई, एक हजार थान मास्क, एक थान थर्मलगन र ग्लोब्स सहयोग स्वरुप प्रदान गर्नुभएको हो ।
स्वास्थ्य सामग्री ग्रहण गर्दै अस्पताल सन्चालक समिति सदस्य समेत रहनुभएका सिद्धार्थनगर नगरपालिका प्रमुख हरिप्रसाद अधिकारीले अस्पतालको सेवालाइ प्रभावकारी बनाउन युवा व्यवसायी रायमाझीले दिएको सहयोग उल्लेखनीय रहेको बताउनु भयो । ‘यो महामारी विरुद्धको युद्धमा सबैको एकता जरुरी छ । सबैको सहयोगले नै कोरोनालाई जित्न सकिन्छ ।’ नगर प्रमुख अधिकारीले भन्नुभयो ।
प्रदेश कोरोना विशेष अस्पतालको रुपमा सन्चालन भएको भीम अस्पतालमा काम गर्ने स्वास्थ्यकर्मीको प्रयोजनार्थ सामाजिक उत्तरदायित्व अन्र्तगत आफुले सकेको सहयोग गरेको र भविश्यमा पनि अस्पताललाई आवश्यक परे अरु सहयोग गर्न तयार रहेको ब्यवसायी रायमाझीले वताउनु भयो ।
कोरोनाका विरामीको उपचारका लागि २८ बेड सन्चालनमा रहेको उक्त अस्पतालमा हाल १९ जना कोरोना पोजिटिभ देखिएका विरामीको उपचार भईरहेको अस्पतालका सूचना अधिकारी गोपाल उपाध्यायले जानकारी गराउनु भयो ।
भीम अस्पताल भैरहवालाई कोरोना भाइरस पोजिटिभ देखिएका विरामीलाई उपचार गर्नेगरी कोरोना विशेष अस्पतालको रुपमा सन्चालन गरिएको छ । उक्त अस्पतालमा कोरोना रोग लागेका विरामीकोलागि विशेष उपचार कक्ष सन्चालन गरिएको छ । तीनवटा भेन्टिलेटर सहित ५ बेड आईसीयु रहेको उक्त अस्पतालमा ३० जना स्वास्थ्यकर्मीले सेवा दिईरहेका छन् ।
कोरोना विशेष अस्पताल सन्चालनको लागि प्रदेश सरकारका सामाजिक विकास मन्त्री सुदर्शन बरालले भीम अस्पतालको संयोजन गरिरहनुभएको छ ।
