कोरोना नियन्त्रणका लागि पश्चिमाञ्चल यातायात व्यवसायी समितिद्वारा आर्थिक सहयोग

बुटवल, २५ बैशाख । पश्चिमाञ्चल यातायात व्यवसायी समितिले कोरोना नियन्त्रण तथा रोकथामका लागि ३ लाख २ हजार आर्थिक सहयोग गरेको छ ।
ट्रक ब्यवसायी तथा ट्रकमा कार्यरत चालक, सहचालक र मजदुरको हकहितका लागि स्थापित समितिले रुपन्देहीको बुटवलस्थित धागो कारखानामा सञ्चालित अस्थायी कोरोना विशेष आइसोलेसन अस्पतालको स्तरबृद्धिका लागि लागि २ लाख ५१ हजार र बुटवल वडा नम्बर ११ लाई ५१ हजार आर्थिक सहयोग प्रदान गरेको हो ।
समितिले अस्थायी कोरोना विशेष अस्पतालको स्तरवृद्वि र वडा नम्बर ११ लाई लकडाउनका कारण समस्यामा परेका गरिव, दुखी तथा मजदुरलाई राहत वितरणका लागि आर्थिक सहयोग गरिएको पश्चिमाञ्चल यातायात व्यवसायी समितिका अध्यक्ष यमप्रसाद पाण्डेले जानकारी गराउनुभयो । समितिको कार्यालयमा बिहीबार एक कार्यक्रमका बिच लुम्विनी प्रादेशिक अस्पताल विकास समितिका अध्यक्ष सूर्यबहादुर भट्टराई र वडा नम्बर ११ का वडाध्यक्ष रामचन्द्र क्षेत्रीलाई समितिको तर्फबाट चेक प्रदान गरिएको हो ।
समितिका अध्यक्ष यमप्रसाद पाण्डेको अध्यक्षतामा भएको आर्थिक सहयोग प्रदान कार्यक्रममा समितिका पूर्व अध्यक्ष लोकराज पोखरेल, समितिका वरिष्ठ उपाध्यक्ष प्रतापबहादुर कार्की, महासचिव जितबहादुर भाट, सचिव बसन्त खड्का, कोषाध्यक्ष हरि रिमाल, कार्यालय प्रमुख बाबुराम अधिकारी, सदस्य लक्ष्मण गैर, गोपाल लम्साल, खगराज गौतम, कार्यालय प्रमुख बाबुराम अधिकारी, सहायक प्रकाश गैरे, वरिष्ठ लेखापाल ऋषिराम भट्टराईलगायतले सामाजिक उत्तरदायित्व अन्तर्गत कोरोरा महामारी रोकथाम तथा नियन्त्रणमा सहयोग पुगोस भन्ने उद्देश्यले समितिले आर्थिक सहयोग प्रदान गरेको र सवैको सहयोगले मात्र महामारी नियन्त्रणमा सघाउ पुग्ने धारणा राख्नु भएको थियो ।