बुटवल, २२ बैशाख । बुटवल उपमहानगरपालिका वडा नं. ११ बुद्धनगरस्थित तिलोत्तमा टोलकी स्थानीय सीता आब्जु परियारले आफु माथि जनप्रतिनिधिहरुकै उपस्थितिमा अन्याय भएको गुनासो गर्नु भएको छ । आफ्नो टोलका मजदुर वर्गले राहत नपाएको भन्दै आक्रोश ब्यक्त गरेको र त्यसको भिडियो सामाजिक सञ्जालमा भाइरल भएका कारण आफु माथि हप्कीदप्की भएको बताउनु भएको हो ।
आफुले ब्यक्त गरेका भनाई सहितको भिडियो सार्वजनिक भएपछि वडा कार्यालयमा बोलाएर आफुलाई मानसिक यातना दिईएको आईतबार सञ्चारकर्मी तथा मानवअधिकारकर्मीहरुलाई उहांले जानकारी गराउनु भयो । गत बैशाख १४ गते दैनिक ज्यालादारी गर्ने मजदुरले राहत नपाएको भन्दै परियारले सामाजिक संजाल फेसबुक मार्फत वडा नं. ११ का वडा अध्यक्ष रामचन्द्र क्षेत्रीको नाम नै लिएर आक्रोश पोख्नु भएको थियो ।
भिडियोमा किन जनप्रतिनिधिको आलोचना गरेको भन्दै आफु माथि वडा कार्यालयमा बोलाएर वडा अध्यक्ष क्षेत्री सहितका जनप्रतिनिधिले २ घण्टासम्म मानसिक यातना दिएर जवरजस्ती कागजमा हस्ताक्षर गर्न लगाएको उहांको आरोप छ । हस्ताक्षर गर्न लगाईएको कागजमा लेखिएको व्यहोरा समेत आफुलाई नसुनाईएको उहांले गुनासो गर्नु भयो । आफ्नो सन्तानलाई जे पनि हुन सक्ने भन्ने धम्की दिएका कारण मानसिकरुपमा कमजोर भएर आमा सिताले पटक पटक आत्महत्याको प्रयास गरेको छोरी मिनु पाण्डेले बताउनु भयो ।
यस विषयमा बुटवल उपमहानगरपालिका वडा नं. ११ का वडा अध्यक्ष रामचन्द्र क्षेत्रीले सितालाई वडा कार्यालयमा बोलाएर सामान्य सोधपुछ गरेको र कुनै धाकधम्की दिने काम नभएको वताउनु भयो । उहांले आफु र जनप्रतिनिधि माथि गलत आरोप लगाईएकोले त्यस विषयमा वडा कार्यालयमा वोलाएर सामान्य सोधपुछ मात्र गरिएको प्रतिक्रिया दिनु भयो ।
घटना सार्वजनिक भएपछि मानव अधिकार तथा शान्ति समाजका केन्द्रीय वरिष्ठ उपाध्यक्ष गोबिन्द खनाललगायत अधिकारकर्मीको टोलीले आब्जुको घरमा पुगेर घटनाको बारेमा जानकारी लिएको थियो । अधिकारकर्मी खनालले विश्व प्रेस स्वतन्त्रता दिवस मनाईरहँदा समाजको पक्षमा सामाजिक सञ्जालमा बोल्दा वडाका जनप्रतिनिधिले बन्द कोठामा राखेर धम्कि दिएर खाली कागजमा सहि गर्न लगाउनु गम्भिर विषय रहेको बताउनु भयो ।
