कपिलवस्तु, १९ बैशाख । कपिलवस्तुमा विहीवार राती एक वडाध्यक्षमाथि गोली प्रहार भएको छ । जिल्लाको यशोधरा गाँउपालिका– ८ का वडाध्यक्ष सहाबुद्दिन मुसलमानलाई लक्षित गरी राती १ बजे गोली प्रहार भएपनि उहां सकुशल रहेको जिल्ला प्रहरी कार्यालय कपिलवस्तुले जनाएको छ ।
वडा नं. ८ को खोरिया गाउँ स्थित आफ्नै घरमा सुतेका वडाध्यक्ष मुसलमानलाई लक्षित गरी चार राउण्ड गोली प्रहार भएपनि वडाध्यक्षलाई गोली नलागेको जिल्ला प्रहरी कार्यालयका प्रहरी नायब उपरीक्षक सुनिल मल्लले जानकारी दिनुभयो । दुई जना अज्ञात व्यक्तिले वडाध्यक्ष मुसलमानलाई गोली प्रहार गरेका थिए । तर कुनै पनि गोली वडाध्यक्षलाई नलागेको प्रहरीले जनाएको छ ।
घटनामा संलग्न रहेको आशंकामा स्थानीय पप्पु मुसलमानलाई नियन्त्रणमा लिएर अनुसन्धान अगाडी बढाइएको प्रहरी नायब उपरीक्षक मल्लले जानकारी दिनुभयो ।
