बुटवल, ३० चैत । विश्वभर फैलिएको कोरोना महामारीको संक्रमण रोकथाम तथा नियन्त्रणका लागि स्थापित कोषमा विभिन्न संघसंस्थाहरुले सहयोग गरेका छन् ।
यसका साथै लुम्बिनी प्रादेशिक अस्पतालको विकास र स्तरोन्नतीका लागि पनि सामाजिक संघसंस्थाहरुको सञ्जाललले आर्थिक सहयोग गरेको छ । सञ्जालमा आवद्ध संघसंस्थाहरुले संस्थाको कारोवार र आर्थिक अवस्था अनुसार अस्पतालको विकास र स्तरोन्नतीका लागि आर्थिक सहयोग गरेका छन् ।
जसअनुसार यातायात ब्यवसायीहरुको संस्था पश्चिम नेपाल बस ब्यवसायी प्रा. लि. ले रु ५ लाख, बुटवल यातायात प्रा. लि. ले १ लाख ५ हजार र यातायात मजदूर तथा व्यवसायी भलाई कोष बुटवलले ५ लाख रुपैयाँ सहयोग गर्ने भएकाछन् ।
प्रदेश ५ सरकारले लुम्बिनी प्रादेशिक अस्पताललाई नमूना अस्पताल बनाउन गरी अस्पतालको स्तरोन्नती प्रक्रिया अघि बढाएकाले संस्थागत निर्णय गरेर आर्थिक सहयोग गरिएको पश्चिम नेपाल बस ब्यवसायी प्रा. लि.का अध्यक्ष दधिराम खरेलले बताउनु भयो । यस्तै बुटवल यातायात प्रा. लि. को कार्यसमिति बैठकले पनि अस्पतालको विकासका लागि सहयोग गर्ने निर्णय गरिएको अध्यक्ष रविन्द्रमान श्रेष्ठले बताउनु भयो ।
यस्तै लुम्बिनी प्रादेशिक अस्पतालको विकास र स्तरोन्नतीका लागि ५ लाख रुपैयाँ सहयोग गर्ने निर्णय गरिएको यातायात मजदूर तथा व्यवसायी भलाई कोष बुटवलका अध्यक्ष दिनेश फुल्लेलले जानकारी गराउनु भयो । अध्यक्ष फुल्लेलका अनुसार भलाई कोषले बुटवल उपमहानगरपालिकाको राहत कोषमा यसअघि एकलाख ५१ हजार रुपियाँ सहयोग गरिसकेको छ ।
रुपन्देहीमा क्रियाशिल संघसंस्थाहरुको संजालको बैठकले यसअघि नै कोरोना विरुद्धको अभियानका लागि संयुक्त रुपमा रकम संकलन गर्ने निर्णय गरेका थिए ।
यस्तै अस्पतालको विकास र स्तरोन्नतीका लागि बुटवल उद्योग बाणिज्य संघले ३ लाख ५१ हजार, रुपन्देही उद्योग संघले ३ लाख ५१ हजार र रुपन्देही व्यापार संघले पनि ३ लाख ५१ हजार रुपैयाँ सहयोग गर्ने निर्णय यस अघिनै गरिसकेको बुटवल उद्योग वाणिज्य संघका अध्यक्ष खिमबहादुर हमालले बताउनु भयो ।
कोरोना संक्रमण रोक्न र यसको जोखिमबाट बच्न संघसंस्थाहरुले सक्दो सहयोग गरिरहेका छन् भने लुम्बिनी प्रादेशिक अस्पताललाई नमूना अस्पतालको रुपमा विकास गर्न सकिए महामारीजन्य यस्ता रोगहरुको उपचारमा महत्वपूर्ण टेवा पुग्ने अपेक्षा गरिएको छ ।
