काठमाडौँ — सरकारले माध्यमिक शिक्षा परीक्षा एसईई स्थगित गरेको छ । शिक्षा विज्ञान तथा प्रविधि मन्त्री गिरिराजमणि पोखेरलले चैत ६ गतेदेखि सुरु हुने एसईई परीक्षा हालका लागि स्थगित गरिएको सनसार पोष्टलाई बताउनु भयो ।
उपप्रधानमन्त्री तथा रक्षामन्त्री ईश्वर पोख्रेलको संयोजकत्वमा गठित कोभिड—१९ संक्रमण, रोकथाम तथा नियन्त्रण उच्चस्तरिय समन्वय समितिको आज बसेको बैठकले एसईई परीक्षा लगायत अन्य परीक्षा तथा सभा, सम्मेलन, गोष्ठि र तालिम अर्को सूचना नभएसम्मका लागि बन्द गर्ने निर्णय गरेको हो ।
बैठकले भोली चैत ६ गते देखि सञ्चालन हुन गैरहेको एसईई, हाल संचालनमा रहेका तथा आगामी दिनमा हुने गरी निर्धारण गरिएका सि टि ई भि टि र विश्व विद्यालय तहका सम्पुर्ण परीक्षाहरु अर्को सूचना नभए सम्मकालागि स्थगित गर्ने निर्णय गरेको छ ।
यस्तै सरकारी, सामुदायिक तथा निजी क्षेत्रबाट सञ्चालित सबै प्रकारका बाल विकास केन्द्रहरु, आधारभूत तथा माध्यमिक विद्यालयहरु, शैक्षिक प्रतिष्ठानहरु र विश्विद्यालयहरुको पठनपाठन पनि २०७६ चैत मसान्त सम्म बन्द गर्ने निर्णय बैठकले गरेको छ ।
यसैगरी बैठकले सरकारी, सामुदायिक, तथा निजी क्षेत्रका तालिम केन्द्र तथा प्रतिष्ठानहरु एबं निजी क्षेत्रका शैक्षिक परामर्श केन्द्रहरुबाट सञ्चालित कार्यक्रमहरु तथा अन्तर्राष्ट्रिय तथा राष्ट्रिय गैर सरकारी संस्थाहरुबाट सञ्चालन हुने सबै प्रकारका तालिम, सेमिनार, गोष्ठि, सभा, सम्मेलन जस्ता कार्यक्रमहरु समेत २०७६ चैत मसान्तसम्मका लागि बन्द गर्ने निर्णय गरेको छ ।
