सडकमा पुर्याइएका १६ परिवारको उचित व्यवस्था गर्न माग

बुटवल, १९ असार । सार्वजनिक जग्गाको अतिक्रमण हटाउने नाममा बुटवल नगरपालिकाले घरबार बिहिन बनाएका नागरिकलाइ तत्काल उचित बसोबासको व्यवस्था गर्न बुटवलमा क्रियाशिल ११ वटा दलले नगरपालिकासंग माग गरेका छन ।
नेपाली काँग्रेस, राष्ट्रिय जनमोर्चा, नयाँ शक्ति पार्टी लगायतका ११ वटा दलको बुधबार बुटवलमा बसेको संयुक्त बैठकले नगरप्रमुखकै नेतृत्वमा घरबार बिहिन बनाइएका १६ परिवारलाइ नगरपालिका भित्रै प्रतिपरिवार दश धुरका दरले जग्गा उपलब्ध गराइ पुनस्र्थापना गर्न माग गरेको हो ।
नगरबासीको गाँसबासको सुरक्षा गर्नु पर्ने नगरप्रमुखको दायित्वलाइ बिर्सेर नगर प्रमुख शिवराज सुवेदीले बर्षौ देखि बस्दै आएका गरिब र विपन्न नागरिकको बस्तीमा एकाएक डोजर चलाउनु निन्दनीय कार्य भएको भन्दै त्यसप्रति घोर आपत्ती जनाइएको छ । संविधानको धारा ३५,३६ र ३७ को उल्लंघन गरेको आरोप लगाउदै उनीहरुले संविधानको पालना गर्न मेयर सुवेदीलाइ आग्रह पनि गरेका छन ।
नेपाली काँग्रेसका नगरसभापति खेलराज पाण्डे, जनमुक्तिका थर्कबहादुर बाह्रघरे मगर, समाजबादी पार्टी नेपालका अशोक बर्मा, नयाँ शक्तिका बामदेव भुसाल, राष्ट्रिय जनमोर्चाका तुलसीराम शर्मा, राष्ट्रिय प्रजातन्त्र पार्टीका निरज प्रताप खाँण, राष्ट्रिय जागरण परिषदका चित्रबहादुर थापा लगायत सहभागि संयुक्त बैठकले नगरपालिकाले घरबास खोसेर सडकमा पुराइएका बिपन्न परिवारलाइ तत्काल उचित पुनस्र्थापना गर्न माग गरेको हो ।
तीन साता अघि बुटवल उपमहानगरले बुटवल १ को जामे मस्जिद अगाडी बस्दै आएका १६ घरपरिवारका गरिब र बिपन्न नागरिकका झुपडी घरमा डोजर लगाएर भत्काइदिएको थियो । घरबार बिहिन भएका पीडितहरुको अहिले सडकको बास भएको छ । २१ दिन देखि उनीहरु रिले अनसनमा बसिरहेका छन । तर नगरपालिकाले उनीहरुको मागका सम्बन्धमा कुनै चासो दिएको छैन । आफैले सडकको बास बनाएका नागरिक प्रति नगरपालिकाले न्युनतम मानविय व्यवहार समेत नदेखाएको भन्दै त्यसको सर्बत्र आलोचना भएको छ ।