बुटवल, ३ असोज । ईलाका प्रहरी कार्यालय ईटहरी सुनसरीले भारतबाट विना ईजाजत भन्सार छली नेपाल भित्र्याउदै गरेको ३९ बण्डल पटाका सहित २ जनालाई पक्राउ गरेको छ ।
प्रहरीले दिएको जानकारी अनुसार जिल्ला सुनसरी इटहरी उपमहानगरपालिका वडा नम्वर ५ स्थित खाद्य गोदाम अगाडी सेतो बोरामा प्याक गरी भारतबाट नेपाल भित्र्याउने क्रममा पटाका सहित सुनसरी जिल्ला श्रीपुर गाउँपालिका वडा नमवर ६ बस्ने वर्ष ३५ को अर्जुन साह र सोही ठाउँ बस्ने बर्ष २२ को रामदेब यादवलाई पक्राउ गरिएको ईलाका प्रहरी कार्यालय ईटहरीका प्रमुख प्रहरी नायव उपरिक्षक धर्मराज भण्डारीले जानकारी दिनुभयो ।
अनुसन्धानको क्रममा नेपालीहरुको महान चाड तिहारका लागि विना ईजाजत भारतवाट खरिद गरी ईटहरीमा विक्री गर्ने उद्देश्यले ल्याउने क्रममा प्रहरीले शंका लागि चेकजाँच गर्ने क्रममा उनीहरुलाई पक्राउ गरी निजहरुको साथबाट उक्त परिमाणको पटाका बरामद भएको हो । निजहरुलाई मुलुकी अपराध संहिता २०७४ अन्तर्गत बिष्फोटक पदार्थ सम्बन्धी कसुरमा मुद्दा चलाउने तयारी भैरहेको प्रहरीले जनाएको छ ।
