श्रीनगरमा आजबाट विद्यालय र सरकारी कार्यालयहरु खोलिदै
काठमाडौं, २ भदौ । भारत सरकारले संविधानको धारा ३७० हटाइएपछि अशान्त बनेको भारतको स्वशासित क्षेत्र काश्मीरको अवस्थालाई बिस्तारै पुरानै अवस्थामा फर्काउने तयारी भइरहेको छ ।
अवस्थालाई सामान्य वनाउन जम्मू–काश्मीरमा सोमबारबाट प्राथमिक विद्यालय र स्थानीय सरकारी कार्यालयहरु खोलिने काश्मीरी अधिकारीहरुले बताएका छन् । अधिकारीहरुका अनुसार आइतबार काश्मीरका केही स्थानमा टेलिफोन सेवा सुचारु गरिएकोमा सोमबार यहाँका प्राथमिक विद्यालय र सरकारी कार्यालयहरु खोल्ने तयारी गरिएको हो ।
जम्मू–काश्मीर सरकारका प्रवक्ता तथा उक्त राज्यका मुख्य सचिव रोहित कंसलले आइतबार पत्रकारहरुसँग कुरा गर्दै हाम्रो योजना श्रीनगरका १ सय ९० भन्दा बढी प्राथमिक विद्यालयहरु खोल्ने रहेको बताउनु भयो । उहांले भन्नुभयो, ‘हामीलाई विश्वास छ कि यसै दिनबाट सरकारी कार्यालयहरुले पनि पूर्णरुपमा काम गर्न थाल्नेछन् र आगामी दिनमा काश्मीरका अन्य क्षेत्रमा पनि बिस्तारै सहजता आउनेछ ।’
तर, सरकारले बताएजस्तै आफ्ना छोराछोरीलाई विद्यालय पठाउन श्रीनगर क्षेत्रका अभिभावकहरु पूर्णरुपमा निश्चिन्त हुनसक्ने वातावरण भने बनिनसकेको बिबिसीले जनाएको छ ।
सोमबार बजार इलाका रहेको र अन्य क्षेत्रभन्दा शान्त रहेको काश्मीरको श्रीनगर क्षेत्रमा विद्यालय खोल्ने बताइएको छ । सरकारले सोमबारदेखि शिक्षकलाई विद्यालयमा उपस्थित हुन सूचित गरे पनि कति अभिभावकले आफ्ना छोराछोरीलाई विद्यालय पठाउँछन् भन्ने महत्वपूर्ण हुनेछ । यसबाट सो क्षेत्रका जनताको मनस्थितिको समेत आँकलन गर्न सकिने बताइएको छ ।
जम्मू–काश्मीर राज्यलाई दिइएको विशेषाधिकार सम्बन्धी संवैधानिक व्यवस्था खारेज गर्ने सरकारको निर्णयपछि काश्मीर क्षेत्रमा कर्फ्यू लगाइनुका साथै सञ्चार तथा इन्टरनेट सेवा समेत अवरुद्ध गरिएको थियो । पछिल्ला केही दिनदेखि सो क्षेत्रमा निषेधहरुलाई बिस्तारै खुकुलो बनाउँदै लगिएको छ । टेलिफोन सुविधा खुकुलो लगिँदै गएकोमा अधिकतम इलाकामा भने अवस्था सामान्य नरहेको बताइएको छ ।
काश्मीर प्रहरीका अनुसार जम्मू–काश्मीरमा धारा ३७० को खारेजीपछि भड्किन सक्ने हिंसा तथा अशान्तिलाई मध्यनजर गर्दै कानुनी तथा सुरक्षा व्यवस्था कायम राख्न सञ्चार सेवा अवरुद्ध गरिएको हो ।
