श्रृङ्गेश्वर धाम सबैको साझा धार्मिक आस्थाको केन्द्र
तिलोत्तमा, २७ साउन । तिलोत्तमा नगरपालिकाको वडा नम्वर ४ स्थित श्रृङ्गेश्वर धाममा ७३ फिट अग्लो त्रिशुल प्रतिस्थापन गरिएको छ ।
साउन महिनाको अन्तिम सोमबार बिहान धाममा बिशेष विधिपुर्वक पूजा गरी बिबेकानन्द सरस्वती महाराजले ७३ फिट अग्लो त्रिशुल प्रतिष्थापन गर्नुभएको हो ।
त्रिशुल प्रतिस्थापन कार्यक्रममा बोल्दै बिबेकानन्द सरस्वती महाराजले हिन्दु धर्म र संस्कृतिको संरक्षणका लागि प्रत्येकले आ आफ्नो ठाउंबाट पहल गर्नुपर्ने बताउनु भयो ।
तिलोत्तमा नगरपालिका वडा नम्वर ४ डिँगरनगरमा करिव १५ कठ्ठा जग्गामा फैलिएको श्रृङ्गेश्वर धामको गुल्मेली सम्पर्क समाज रुपन्देहीले संरक्षण र प्रवद्र्धन सहित विविध बिकास निर्माणका कामहरु गर्दै आईरहेको छ ।
श्रृङ्गेश्वर धामलाई धार्मिक पर्यटकीय क्षेत्रका रुपमा बिस्तार गर्न विभिन्न मठ मन्दिरको निर्माण संगै धाममा अहिले पर्यटक आकर्षण गर्न बिश्वकै सबैभन्दा अग्लो त्रिशुल राखिएको गुल्मेली समपर्क समाजका अध्यक्ष ईन्जिनियर हिरा बहादुर भलामीले जानकारी गराउनु भयो ।
धाममा सोमबार प्रतिष्थापन गरिएको अग्लो त्रिशुल राख्न समाजका सदस्य तुल्सीराम कँडेलले सहयोग गर्नुभएको हो ।
यस अघि धाम परिसर भित्र आफ्नै लगानीमा कैलाश पर्वत र मानसरोबर निर्माण गर्नुभएका शिव भक्त कँडेलले भगवान शिबको प्रशन्नताका लागि त्रिशुल निर्माण गरी कैलाश पर्वत र मानसरोवर क्षेत्रमा प्रतिष्थापन गरिएको बताउनु भयो ।
श्रृङ्गेश्वर धामको समग्र विकासका लागि समाजसेवी तथा दानविरहरु बुटवल निवासी चुन्न पौडेलको परिवारले आफ्ना आमा बुवाको स्मृतिमा सभाहल र पशुपति नाथको मन्दिर निर्माण गर्नुभएको छ । यस्तै समाजसेवी मणिग्राम निवासी बालकृष्ण भुसाल र पशुपति घिमिरेले विभिन्न देवी देवताका मठ मन्दिर र हवन कुण्ड निर्माण गर्नुभएको धामका अध्यक्ष ऋषि भण्डारीले जानकारी दिनुभयो । उहांका अनुसार धाम क्षेत्रमा बर पिपलका विरुवा लगाईनुका साथै जेष्ठ नागरिकहरुलाई लक्षित गरि खेम पुनको संयोजकत्वमा जेष्ठ नागरिक मिलन केन्द्र भवन निर्माण भैरहेको छ । भवन निर्माण कार्य करिव करिव अन्तिम चरणमा पुगेको छ । यस्तै धामको सुरक्षाका लागि चारैतर्फ कम्पाउण्डवाल लगाउने काममा पनि विभिन्न दाताहरुले सहयोग गर्नुभएको धामका अध्यक्ष भण्डारीले बताउनु भयो ।
गुल्मेली सम्पर्क समाजमा विशुद्ध गुल्मेलीहरु मात्र रहेपनि श्रृङ्गेश्वर धामलाई भने सबैको साझा धार्मिक आस्थाको केन्द्र वनाईएको छ । धामको साधारण, आजीवन तथा संस्थापक सदस्य वन्न ईक्षुक सवै जिल्लाका नागरिकलाई खुला गरिएको छ ।
